Bu gün QMİ sədri Hacı Allahşükür Paşazadə haqqında sensasiyalı bir xəbər yayıldı. 

Xəbərdə bildirilirdi ki, Bütün Qafqazın Şeyxi QMİ–də axundların otaqlarında, Bakı İslam Universitetinin rektoru və müəllimlərin kabinetlərində, müavini Hacı Salmanın otağında və Həccə sənəd toplama idarəsində gizli kameralar yerləşdirtdirib və öz işçilərini gizli şəkildə izləyib.   Qeyd olunur ki, bu əməlin üstü bir aydır ki açılıb.

 Bununla belə, əməlin faş olunmasının təsadüfdən, yoxsa başqa qəsdən təşkil edilməsi bilinmir.   Məsələyə aydınlıq gətirməsi üçün QMİ-nin mətbuat xidmətinin rəhbəri Rəhimə Dadaşova ilə əlaqə saxladıq. Xanım Dadaşova XeberLent.az informasiya agentliyinə açıqlamasında bildirdi ki, bu, açıq-aydın bir yalandır. Hər dəfə QMİ-ni və Şeyxi ləkələmək üçün bu cür dezinformasiya dolu xəbərlər kimlərsə tərəfindən mətbuata sızdırılır.  “Bəli, bizdə təhlükəsizlik kameraları mövcuddur. Lakin biz bu kameraları kimlərisə güdmək üçün otaqlara yox, əksinə, təhlükəsizliyimiz üçün binanın fasadına və idarənin girişinə yerləşdirmişik. Hal-hazırda mən öz otağımdayam və heç bir təhlükəsizlik kamerası da görmürəm. Bir daha vurğulayıram, bu cür xəbərlər, düşmənlərin işidir”.   

Fürsətdən istifadə edərək, Rəhimə xanımdan onlarla Dini Komitə arasında baş vermiş ehsan narazıçılığına münasibət bildirməsini də istədik. Müsahibimiz də açıqlamasında bildirdi ki, bizim Dini Komitəylə heç bir problemimiz yoxdur. Bu da bəzi qəzetlərin aravurmasıdır:  “Əvvəla, onu qeyd edim ki, bu gün “Yeni Musavat” qəzeti bizdə ünvanladığınız suala uyğun bir sual verdi, lakin aldığı cavab əvəzinə başqa bir şeylər yazdı. O ki, qaldı ehsan məsələsinə, biz dini idarə olaraq yalnız tövsiyələr verə bilirik. ”Təzəpir" məscid kompleksində yerləşən ehsan zalları ayrı-ayrı iş adamlarına icarəyə verilib. 

Biz onların işlərinə qarışa bilmirik.Orada divara yazı yazıb vurmuşuq. Böyük hərflərlə QMİ Qazılar Şurasının ölü sahibi üçün vacib olan və olmayan əməllər qeyd olunub. İsrafla bağlı məsələlər göstərilib.  Bizim fikirlərimiz orda yazılıb. Onlara da bu məsələlər izah olunur. Sadə ehsan süfrəsi təklif olunur. Ancaq məclis sahibi əlavə yemək sifariş edəndə artıq mərasim zallarını işlədənlər bundan imtina edə bilməz.

 Bu iş məcburi ola bilməz".  R.Dadaşova deyir ki, israfçı mərasimlərdən imtinaya çağırışlar olsa da, kimsə konkret olaraq qabağa düşüb birinci olmaq istəmir: “Təəssüf ki, əmələ gələndə heç kim birinci olmaq istəmir. Biz qadağa qoysaq da bunun nəticəsi olmayacaq. Bunun üçün insanların fikiriləri dəyişməlidir. İnanıram ki, hökumətin bu yöndə qərar verməsi müsbət nəticə verəcək”. QMİ yetkilisinə görə, adət-ənənənin aradan götürülməsi zaman alacaq, çünki insanlar illər ərzində davam edən adətlərdən imtina etmək istəmir: “Ümumiyyətlə, adət-ənənələr ədalətli sahə hesab olunur, burada dəyişiklik aparmaq çətindir. Ancaq indiki şəraitdə QMİ-nin bu yöndə çağırışları, eyni zamanda hökumətin bu istiqamətdə addımları bu adətlərdən imtina üçün zəmin yaradır. Bu sahədə ildırım sürətilə hansısa nəticəyə nail olmaq çox çətin məsələdir”.