Xəbər verdiyimiz kimi, Xeberle.com portalına yeni baş redaktor təyin olunub. 

Birlik.az saytının bugünkü həmmüsahibi eks baş redaktor Ramil Zeynallıdır. Həmin müsahibəni sizə təqdim edirik:

"Xeberle.com mənim ikinci ailəmdir. İnsan ailəsini, doğmalarını necə tərk edə bilər? Hazırda “Xeberle” MMC-nin direktoru və həmtəsisçisi kimi fəaliyyətimi davam etdirirəm". 

 –  Ramil bəy, bu həftə Sumqayıt mediası üçün şok xəbər sizin saytdakı baş redaktor dəyişikliyi oldu.Dəyişiklik nə ilə əlaqədardır?

– Hesab etmirəm ki, xeberle.com saytındakı baş redaktor dəyişikliyi Sumqayıt mediası üçün şok hadisədir. İki il bundan öncə fəaliyyətə birgə başladıq. Mən Ramil Zeynallı, Elnur Ağayev və Kamal Almuradlının birgə yaratdığı bu xəbər portalı qısa müddətdə çevik, dəqiq və etibarlı informasiya mənbəyi kimi özünü təsdiqləyə bildi. İki il müddətində baş redaktoru olduğum saytda bir sıra yeniliklər və irəliləyişlər oldu. O ki qaldı dəyişikliyə hesab edirəm ki, zəruri və vaxtında atılmış addımdır. Biz işə birgə başladıq və birgə də davam edirik. Biz birlikdə güclüyük. Dostum və həmkarım Elnur Ağayevi baş redaktor təyin olunması münasibətilə təbrik edirəm. Təsadüfi deyildir ki, portal artıq Sumqayıtın media həyatında mühüm yer tutur. Mən heç yana getməmişəm. Xeberle.com mənim ikinci ailəmdir. İnsan ailəsini, doğmalarını necə tərk edə bilər? Hazırda “Xeberle” MMC-nin direktoru və həmtəsisçisi kimi fəaliyyətimi davam etdirirəm.

– Ramil bəy, saytın iş prosesində hansısa yeniliklər gözlənilir?

– Yeniliklər hər zaman olmalıdır. Saytın iş prosesində də bir sıra yeniliklərin edilməsi nəzərdə tutulur. Bununla bağlı yaxın zamanlarda müvafiq addımlar atılacaq.

– Baş redaktor vəzifəsindən getməklə, ümumiyyətlə, media sahəsini tərk edəcəksiniz?

- Mən dəyişikliyin tərəfdarıyam. Hər halda hər bir dəyişiklik inkişafa hesablanıb. Media sahəsini isə tərk etmək fikrim yoxdur. Saytda da fəaliyyətimi davam etdirirəm.