Sumqayıt şəhər Xəzər bağlar massivində məskunlaşan sakinlər kanalizasiya sularının su kanallarına axıdılmasından və heç bir qurumun bu barədə bir tədbir görməməsindən şikayətçidirlər. 

  Bolgexeber.TV-yə danışan sakinlər kanalların üzəri açıq olduğundan ətrafı dözülməz üfunət iyi bürüməklə yanaşı, uşaqlarının da hər an kanala yıxılma təhlükəsində olduğunu söyləyirlər. Hətta bu yaxınlarda 4 yaşlı bir uşağın kanala düşərək boğulması hər kəsə məlumdur. Sakinlərin sözlərinə görə el arasında “Acıdərə” kimi tanınan kanalın qurudulacağını dair verilən vəddən artıq 4 il keçməsinə baxmayaraq heç bir nümayəndə əraziyə yaxın durmur. Kanaldan axan su isə günbəgün torpağı yuyub məcrasını genişlətməkdədir: “Bu səbəbdən məcbur olub öz hesabımıza kanalın ətrafını çəpərləməklə yanaşı evimizə getmək üçün də kanal üzərindən körpü salmışıq. Lakin yağış yağan kimi kanal daşdığından heç körpü də dadımıza çatmır.Yağışla bərabər evlərimizə dolan kanalizasiya suları övladlarımızın xəstəlik tapmasına səbəb olur.Yollar da bərbad olduğundan nə təcili yardım çağıra bilirik nə zamanında xəstəxanaya gedə bilirik.Allah eləməsin ağır bir xəstəmiz olsa yolda keçinəcək. Bir sözlə dərdimizə əlac edən tapılmırki, tapılmır”.

 Məsələ ilə bağlı Xəzər Bağçılıq-Yoldaşlıq Cəmiyyətinin sədri Hüseyn Tanrıverdiylə görüşdük. O məsələdən agah olduğunu lakin problemin onlara aidiyyatı olmadığını bildirdi. Bizi istiqamətləndirərək Sumqayıt Su -kanal idarəsinə müraciət etməli olduğumuzu söylədi. Aidiyyatı üzrə idarənin rəisi Ədalət Bağırov  açıqlama verməkdən imtina etdi.

Ümidvarıq ki, ki, aidiyyatı qurumlar sujetimizi izlədikdən sonra sakinlərin problemləri ilə maraqlanacaq və tez bir zamanda bu problemlərin həllinə çalışacaqlar.