Sumqayıtın 9 aylıq hesabatında 18-ci mikrorayonda 24 yaşayış binası və 2 uşaq bağçasını istiliklə təmin edəcək qazanxananın tikilməsi öz əksini tapmışdı. Bəs bu qazanxana nə vaxt istifadəyə veriləcək?

Xeberle.com-un sosial şəbəkədəki hesablarına 18-ci mikrorayon sakinləri tərəfindən şikayətlər daxil olub. Müraciətlərdə qeyd olunub ki, qazanxana tikilsə belə, onlara bu il istilik verilməyəcəyi bildirilib. Məsələ ilə bağlı "Azəristiliktəchizat” ASC-nin "Sumqayıtistiliktəchizatı” İdarəsinin rəisi Avtandil Nuriyevlə əlaqə saxladıq. O qeyd etdi ki, bu məsələ doğrudur. "18-ci mikrorayonda hər şey hazırdır, qazanxana tikilib və işlək vəziyyətdədir. Sadəcə qaz xətti və işıq xətti çəkilməyib. Çünki dövlət buna pul ayırmayıb və saxlayıb 2018-ci ilin investisiyasına. Mən bununla razı deyiləm, açıq şəkildə inqilab eləyirəm. Azəristilik 5 dəfə hökumətə məktub yazıb, hökumət də həm bizə, həm də Sumqayıt şəhər İcra Hakimiyyətinə bildirib ki, bu məsələyə 2018-ci ildə baxılacaq". A.Nuriyev bundan başqa qeyd edib ki, Sumqayıtın tam istilik sistemi ilə təmin olunması nəzərdə tutulub. Və investisiya ayrılan kimi bu işlərə başlanılacaq.