"Jurnalistlər Ekstremal Şəraitdə” İctimai Birliyi növbəti layihəsini uğurla başa vurub. Bu dəfəki iş  Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyəsi ilə "Narkomaniyanın insanlığa vurduğu bəlalardan xilas yollarının axtarılması ilə bağlı tədbirlərin təşkili və video-çarxların hazırlanması” layihəsi olub. Layihənin sonuncu tədbiri "Xəzər” universitetinin bir qrup tələbələriylə qurulan maraqlı müzakirə ilə yekunlaşıb. Layihə rəhbəri, peşəkar jurnalist Firuzə Əsədullayeva bu ilin may ayından başlayan layihə çərçivəsində 3 maraqlı video-çarxın hazırlandığını, az əvvəl Masallıda vacib mövzu barədə dəyirmi masa keçirildiyini  bildirib.  Universitet tələbələri üçün də nümayiş olunan video-çarxlar  "Asan yol, çətin həyat”, "Ağ ölüm: Xilas edin, yaşasın”,  "Sağlam yaşamaq istəyirəm” adlanır. Qısa filmlərin rejissoru Elxan Xanəlizadədir.  F.Əsədullayevanın sözlərinə görə, layihənin hesabatından sonra, video-çarxların geniş ictimaiyyət qarşısında, internet mediada, yerli tv kanallarında yayınlanacağı planlaşdırılır.  "Dünyanın eləcə də, Azərbaycanın bəlası olan narkomaniyayla mübarizə  tək dövlətin yox, bütün insanların problemlərinə çevrilməlidir. Bu səbəbdən gənclərin maarifləndiilməsi, mübarizə yollarına hazırlanması hər kəsin borcudur.”