Komitənin hüquq şöbəsinin müdiri Taliyə İbrahimovanınPublika.az-a verdiyi məlumata görə, onlar qızın saxlandığı yerdə olublar: "Qızı yaşayış üçün uyğun olmayan yerdə saxlayıblar. Həmin yerdə yaşamaq üçün heç bir şərait yoxdur, hesab edin ki, daşın üstündə qalıb. Ailə qızın orada saxlandığını təsdiq edir. Lakin müşahidələrimiz göstərdi ki, qızın orada saxlanması ona əzab verməkdir. Qız evdən qaçırdısa, o müalicə oluna bilərdi. Tövlə kimi yerdə xəstə insanı saxlamaq nə dərəcədə doğrudur? Ata özü üçün ayrıca ev tikib, ancaq qızlarını yaşayış üçün yararsız olan yerdə saxlayıb. Düzdür, ora tövlə deyil, amma heç bir şəraiti olmayan bir tikilidir. Ailədən qızın zəncirləndiyinin yalan məlumat olduğunu deyirlər. Ailə və qonşularla söhbət etdik. İcra hakimiyyətində Gender zorakılıq və uşaqlara qarşı zorakılıq qrupu ilə təcili iclas keçirildi. Biz də monitorinq qrupu qarşısında hadisə barədə məlumatı olduğu halda susan tərəflər barədə tədbir görülməsi üçün məsələ qaldırdıq. Hazırda cinayət işi aparılır və biz də nəticəni gözləyirik. Düşünürük ki, təqsirli hesab edilsə, məsuliyyətə cəlb edilməlidir”.

 

T.İbrahimova Pərvanənin bacısının ölümü ilə bağlı yayılan məlumatlara da aydınlıq gətirdi: "Qonşulardan əldə etdiyimiz məlumata görə qızların atası Valeh Məmmədovun özünün də müəyyən psixoloji problemləri olub. Digər qızı ölümünə gəldikdə, ailə bu barədə telekanalda yayılan məlumatın yalan olduğunu bildirdilər. Onların sözlərinə görə həmin qızın da psixoloji problemləri olub. Ölüm səbəbi həmin şəraitdə saxlanması deyil. Atası bildirdi ki, qızların hər ikisinin anadangəlmə psixoloji problemləri var. Pərvanə və bacısı illər əvvəl Bakıda Mərdəkanda ruhi dispanserdə müalicə alıb. Hər ikisinin psixoloji problemlərinə görə təhsil almayıblar. Ümumiyyətlə onlar cəmiyyətə buraxılmayıb, qapalı saxlanılıb. Şəkillərdə də görünür ki, qız inkişafdan geri qalıb. Pərvanənin 27 yaşı var”.

 

Komitə rəsmisinin sözlərinə görə, bu faktın üstündə dayanmaqla məsələyə düzgün qiymət verilməlidir: "Bu məişət zorakılığı halıdır. 2010-cu ildə bu barədə qanun qəbul olunub və bu halla qarşılaşanlar yerli icra hakimiyyəti, polisə müraciət etməlidir”.