“Uğurun sirri” layihəsinin növbəti qonağı professor Heydər İmanovdur. 

Uğur nədir? Siz özünüzü uğurlar qazanmış biri hesab edirsinizmi? 

- Uğur insanın harmonik inkişafında pik həddinə çatmasıdır. Maddi rifah uğurun primitiv anlamıdır.

Belə bir deyim var: uğuru da, uğursuzluğu da öncədən proqnozlaşdırmaq mümkündür. Siz uğurlarınızı proqnozlaşdırana qədər hansı yollardan keçmisiniz?

- İnstitutu bitirdikdən sonra 15 ildə öz karyeramı planlayaraq böyük bir elmi – istehsalat birliyində adi mühəndisdən baş direktor vəzifəsinə kimi yüksəldim. Bu istiqamətdə bütün proqnozlarım özünü doğrultdu. Əgər sən də uğuru planlamağı öyrənsən, onda onu planlaya bilərsən.

Sizə görə “Uğurun düsturu” nədir? Ümumiyyətlə, uğurlu biri olmaq üçün nə etmək, nədən başlamaq lazımdır?

- Əsil uğuru ancaq bütün ömrün boyu biliyini artırmaqla və yaradıcı əmək fəaliyyətinlə əldə edə bilərsən. 18 yaşım olanda öz uğurumun düsturunu qəbul etdim. Onu Amerikalı milyoner Armand Xammer səsləndirmişdi: “Əgər sən 18 yaşlı gənc bundan sonrakı 18 il ərzində öz üzərində gündə 18 saat, həftədə 7 gün işləsən onda sənin bəxtin mütləq gətirəcək”.

Deyirlər, uğur həm də uğursuzluqdur. Axı, insanın başı daşdan-daşa dəyir. Apardığınız mübarizədə uğursuzuqlarla üzləşəndə nə edirsiniz?

- Ritorik sualdır. Çinlilərdə belə bir atalar sözü var: “Yolu ancaq gedən keçə bilər”.

Mütəxəsislər şərh edirlər ki, danışıq qabiliyyətinə yiyələn hər kəs cəmiyyətdə yaxşı mövqe tuta və maliyyə uğurları qazana bilər. Siz insan münasibətlərində əsasən nəyə diqqət yetirirsiniz?

- Uğur əldə etmək üçün təkcə yüksək səviyyəli mütəxəssis olmaq azdır, bundan əlavə sən insanları başa düşmək üçün həm yaxşı psixoloq, öz fikrini başa salmaq üçün yaxşı pedaqoq, fikrini aşılamaq üçün bir az artist, fiziki yükləri qəbul edə bilmək üçün isə bir az da  idmançı olmalısan.

İstifadə etmədiyimiz qabiliyyətimizi üzə çıxarmaqda və inkişaf etdirməkdə insana yardımçı olacaq əsas ünsürlar hansılardır?

- Düzgünlük, məsuliyyətlilik, səriştəlik, pozitivlik, səmimilik və kreativlik.

Bəzi gənclər bir işə başlayanda “Düşün, tətbiq et və nəticələndir” prinsipini unudurlar. Yəni, onlar düşündüklərini ya tətbiq etmir, ya da nəticələndirmirlər. Bu problemlə üzləşənlərə nə söyləmək istərdiniz?

- Belə gənclər uğura heç yaxınlaşa bilməyəcəklər.

- Qarşısındakına “əhəmiyyətlisən” mesajını verməkdə çətinlik çəkənlərə nə söyləmək istərdiniz?

- Öz həyat kredomu  mən belə ifadə edərdim: “Gənclikdə - inamım özümə,   məhəbbətim (sevgim) həyata və  ümidim uğura. Bu gün - inamım ALLAHa, qayğım Vətənə, sevgim ailəyə, ümidim sülhə”.

Övladlarınızın gələcəkdə uğurlu ola bilməsi üçün daha fərqli davrana bilirsinizmi?

- Bütün həyatı boyu təhsil almaq təkcə bilik almaq  yox, həm də əxlaqın  xalq adət ənənələri əsasında tərbiyələndirilməsidir.

Sizcə insanların ən güclü silahı nədir - ağıl, yoxsa ürək?

- Həm ağıl, həm ürək, həm də ayaqları.

Cəfər Mənsimi,azadinform.az