İnformasiya texnologiyalarının dayanmadan inkişaf etdiyi bir dövrdə insanlar məsafələrdən asılı olmayaraq bir-birlərini görmədən ünsiyyətdə olur, işgüzar münasibətlər qururlar. Bu halda onlar barədə yaranan ilkin təəssürat və nüfuz yazı tərzlərindən, fikirlərini sözlərə çevirmə bacarığından asılı olur. Hal-hazırda işgüzar fəaliyyətin əsas hissəsini yazışmalar təşkil edir və belədə peşəkar yazı tərzi vəzifəsindən asılı olmayaraq hər kəs üçün eyni dərəcədə önəmlidir. Peşəkar işgüzar yazışma bacarığına yiyələnməklə gənclər fikirlərinə inam yaradır, özləri haqqında peşəkar fikir formalaşdırırlar.
Artıq qəbul olunmuş haldır ki, bir dəfə görüşüb müəyyən məsələləri müzakirə etdikdən sonra digər məqamlar yazışmalar əsasında təsdiq edilir.
Xeberle.com məlumat verir ki, bununla bağlı Sumqayıt Gənclər evində"Uğurlu karyera işgüzar yazışmalardan başlayır" adlı layihə çərçivəsində təlim keçiriləcək. Təlimdə gənclər tərəfindən gələcəkdə iş prosesində qarşılaşdıqları vəziyyətlərə uyğun işgüzar yazışma nümunələri nümayiş etdiriləcək.
Təlim noyabrın 5-i saat 12:00-da başlanacaq. Bu da öz növbəsində onların gələcək işlərində yazılı iş vərdişlərinə yiyələnmələrinə səbəb olacaq. Xatırladaq ki, işgüzar yazışmalarla yanaşı, əməli yazı nümunələri, həm dövlət, həm də özəl sektorda gündəlik işin ayrılmaz tərkib hissəsidir. Biz işgüzar yazışmalarla bağlı həm informativ, həm də praktiki vasitələrdən istifadə edərək layihədə qoyduğumuz problemin həllinə nail olmuş olacağıq. Layihənin əsas məqsədi də ondan ibarətdir ki, ali və orta ixtisas müəssisələrini bitirmiş və ya son kurslarda olan gənclərə işgüzar yazışma bacarıqlarını inkişaf etdirmək, işgüzar yazışma formalarının müxtəlif formaları haqqında məlumatlandırmaqdır. Layihədə 18-30 yaşda olan gənclər iştirak edə bilər.
Layihə çərçivəsində artıq Bakı və Gəncə şəhərində nəzərdə tutulan təlimlər həyata keçirilib. Ölkənin böyük şəhərlərinin hədəf seçilməsində əsas səbəb odur ki, ali və orta ixtisas təhsili müəssisələrinin fəaliyyət göstərdiyi ərazilərdə yaşayan gənclər faydalana bilsin. Həmçinin böyük şəhərlərdə daha çox karyera qurmağa can atan gənclər var, eyni zamanda, iş yeri tapmaq və işlə təmin olunmaq ehtimalı daha yüksəkdir. Qeyd edək ki, bu tipli layihə üzrə təlimlər davamlı şəkildə əsasən özəl şirkətlər tərəfindən həyata keçirilib. Qrant müsabiqələrində isə bu mövzuda layihələr olmayıb. Layihənin lazımlılığını nəzərə alaraq bunun davamlı şəkildə gələcəkdə Azərbaycanın bütün şəhər və rayonlarında keçirilməsi planlaşdırılır.
Xəbərdən istifadə edərkən istinad etmək vacibdir.
