YAP Nərimanov rayon təşkilatında Azərbaycan Respublikasının Prezidenti yanında Gənclər Fondunun maliyyə dəstəyi ilə "Uşaqlara vətənpərvərlik hissinin aşılanması” adlı layihənin açılış mərasimi olub. Xeberle.com məlumat verir ki, layihə Gənclər Fondunun elan etdiyi VIII qrant müsabiqəsinin fərdi şəxslər üçün kateqoriyası üzrə qalib olmuş Cavanşir Həsənov tərəfindən icra olunur. Tədbirdə Səfərbərlik və Hərbi Xidmətə çağırış üzrə Dövlət Xidmətinin Nərimanov rayon İdarəsinin Həqiqi Hərbi Xidmətə Çağırış şöbəsinin zabiti kapitan Ceyhun Əsədov, YAP Nərimanov rayon təşkilatının baş təlimatçısı Nizami Babaşov, YAP Nərimanov rayon Gənclər Birliyinin sədri Yusif Babanlı da iştirak edib. Layihənin əsas məqsədi gənclər arasında vətənpərvərlik ideyalarını təbliğ etmək, onları işğal altında olan Azərbaycan torpaqlarının azad olunacağına inandırmaq və bu yolda mübarizəyə mənəvi baxımdan hazırlamaq, Vətənimizin azadlığının və təhlükəsizliyinin hər bir gəncin öz ölkəsinə bağlılığından, xalqına olan sevgisindən asılı olduğu düşüncəsini aşılamaqdır. Tədbirdə çıxış edən Səfərbərlik və Hərbi Xidmətə çağırış üzrə Dövlət Xidmətinin Nərimanov rayon İdarəsinin Həqiqi Hərbi Xidmətə Çağırış şöbəsinin zabiti kapitan Ceyhun Əsədov qeyd etmişdir ki, Azərbaycan xalqının ümummilli lideri, böyük şəxsiyyət və dövlət xadimi Heydər Əliyev gənc nəslin vətənpərvərlik ruhunda tərbiyə olunmasını gənclərin tərbiyəsinə cavabdehlik daşıyan bütün qurumların qarşısında ən mühüm vəzifə kimi qoyur, müxtəlif səviyyəli tədbirlərdə, gənclərlə, müəllimlərlə, ziyalılarla çoxsaylı görüşlərində bu məsələyə dönə-dönə toxunaraq öz müdrik məsləhət, tövsiyə və tapşırıqlarını verirdi. Tədbir zamanı iştirakçılara layihə haqqında geniş məlumatları özündə əks etdirən bukletlər paylanmışdır. Sonda xatirə şəkli çəkilmiş və bununla da tədbir öz işini başa vurmuşdur.
Xəbərdən istifadə edərkən istinad etmək vacibdir.
