Xəbər veridyimiz kimi, Türkiyənin İzmir şəhərində müalicə alan imkansız bir azərbaycanlı ailəsinin uşaqlarına yardımla bağlı orada xeyriyyə kampaniyasına start verilib. "Palmalar şəhəri”ndə yaşayan soydaşımız, jurnalist Nigar Börek Ege Universitetində müalicə alan həmin uşaqlarının "səs”i olub.
Bu çağırışa əvvəlcə İzmirdə fəaliyyət göstərən Azərbaycan Mədəniyyət və Həmrəylik Dərnəyinin sədri, habelə Türkiyə Azərbaycan Dərnəkləri Federasiyası mətbuat katibinin köməkçisi Mülazim Kardelen Paşa səs verib. O, srağagün xəstəxanaya gələrək uşaqların valideynləri ilə görüşüb, uşaqları ziyarət edib, hər cür kömək edəcəyinə söz verib.
Bu gün artıq İzmirdə fəaliyyət göstərən Dərnəklər həmin uşaqlara diqqətini artırıb. Mülazim Paşadan sonra Azərbaycan Türkləri və Dost Federasiyaları rəhbəri İsa Ambarcı və Aday Dərsanəsinin sahibi Özay Arsel də uşaqları ziyarət etməyə gəlib. Onlar da öz imkanları daxilində uşaqlara yardım edəcəklərini və ətraflarındakı bütün kollektivi bu mərhəmətli işə səfərbər edəcəklərini söyləyiblər. Onlardan başqa İzmirdə yaşayan digər azərbaycanlılar da həmin ailəyə baş çəkərək əllərindən gələn hər cür yardımı edəcəklərini bildiriblər.
Qeyd edək ki, ötən gün bu uşaqları ziyarət edən Mülazim Paşa bu gün də ailənin yanına gəlmiş, hər gün onların yanına gələcəyini, müxtəlif dəstək verəcəyini söyləyib. Uşaqların atası Məzahir bəy bu maddi və mənəvi dəstəyə görə onlara öz təşəkkürünü bildirib. O, son 3 gündə özlərini Azərbaycandakı kimi hiss etdiklərini və tənha olmadıqlarını bildirib. Xatırladaq ki, bu gün ailəni ziyarət edənlər arasında bu kampaniyaya başlayan Nigar Börek də olub. O da ailəyə imkanı daxilində hər cür yardım edəcəyini və kampaniyanı daha da genişləndirəcəyini bildirib.
Xəbərdən istifadə edərkən istinad etmək vacibdir.
