"Gürcüstanda yaşayan azərbaycanlılar bütün sahələr üzrə təhsil ala bilərlər. Onlar istədikləri sahəni, peşəni seçməkdə azaddırlar”.
Bunu Gürcüstanda Təhsilin keyfiyyətinin yaxşılaşdırılması üzrə Milli Mərkəzin direktoru, Gürcüstanın keçmiş elm və təhsil naziri Tamar Sanikidze deyib. O, qeyd edib ki, Gürcüstanda ali təhsil almaq üçün "4+1” formatında xüsusi proqramlar mövcuddur.
"Bu, o deməkdir ki, azərbaycanlılar da daxil olmaqla etnik azlıqlar dövlət imtahanı verməklə ali məktəblərdə təhsil ala bilirlər. Bu halda onlar bir il ərzində intensiv olaraq gürcü dili kurslarında iştirak edə və bundan sonra dövlət hesabına Gürcüstan ali məktəblərində təhsil ala bilərlər. Artıq Gürcüstanda bu proqram üzrə məzunlar var. Onlar yaxşı təhsil alıblar və həm Azərbaycan, həm də gürcü dillərində sərbəst şəkildə danışırlar".
T.Sanikidzenin sözlərinə görə, hazırda Gürcüstanda etnik azlıqlar üçün yeni qanun layihəsi
hazırlanır: "Biz şagirdlərin nəticələrini nəzərdən keçirdikdə yeni sistemə ehtiyac olduğunu gördük. Ümumiyyətlə, Gürcüstan çoxmillətli ölkədir. Gürcülərin bu millətlərlə qədim dövrlərdən yaxşı əlaqələri var. Təhsil baxımından danışsaq, azərbaycanlılarda daxil olmaqla etnik xalqların öz dillərində təhsil almaq hüququ var. Bu, Gürcüstan Konstitusiyasında öz əksini tapıb və biz bunu tamamilə dəstəkləyirik. Etnik xalqlar öz dilləri ilə yanaşı, həm də gürcü dilində təhsil alırlar. Bu, həm dövlətin marağındadır, həm də həmin azlıqların cəmiyyətin inteqrasiyası baxımından olduqca önəmlidir".(AzVision.az )
Xəbərdən istifadə edərkən istinad etmək vacibdir.
