Sumqayıtın mədəniyyət müəssisələrində Ümummilli Liderimiz Heydər Əliyevin anım günü ilə əlaqədar silsilə tədbirlər keçirilib.
Sumqayıt şəhər Heydər Əliyev Mərkəzində Mədəniyyət və Turizm İdarəsi, Təhsil şöbəsi, Gənclər və İdman Baş İdarəsi, SDU ilə birgə təşkil etdiyi elmi – praktik seminarda Mərkəzin direktoru Aygün Zülfüqarlı, SDU dosenti, Tarix üzrə Fəlsəfə doktoru Elmar Xəlilov, Gənclər və İdman Baş İdarəsinin gənclərlə iş sektorunun müdiri Ceyhun Hüseynov iştirak ediblər. Natiqlər öz çıxışlarında Dahi Öndərin xilaskarlıq, quruculuq missiyasından, Azərbaycan xalqı və dövləti naminə misilsiz xidmətlərindən, Təhsilin inkişafına, gənc nəslə qayğısından, Sumqayıta səfərlərindən və bu səfərlərin şəhərin inkişafına olan mühüm təsirlərindən söz açıblar. O da vurğulanıb ki, bu gün prezident İlham Əliyev tərəfindən ölkəmiz siyasi sabitlik, iqtisadi yüksəliş yolu ilə hərtərəfli, dinamik inkişaf edir. Ali və orta ixtisas məktəblərinin tələbələrinin, orta məktəblərin yuxarı sinif şagirdlərinin, gənc müəllimlərin və gənc mütəxəssislərin iştirak etdiyi tədbirdə Ümummilli Liderimiz Heydər Əliyevin həyat və fəaliyyətindən bəhs edən sənədli film və Sumqayıt səfərlərini əks etdirən fotoslayd iştirakçılara təqdim edilib.
Heydər Əliyev Mərkəzində daha bir tədbir "Next Tuition Sentre” şirkətinin təşkilatçılığı, Sumqayıt şəhər Mədəniyyət və Turizm İdarəsi, Təhsil Şöbəsi və Sumqayıt şəhər Gənclər və İdman Baş idarəsinin birgə dəstəyi ilə keçirilib.
"Next Tuition Sentre” layihəsi olan məktəblərarası "Xəmsə" intellektual oyununa şəhərin bir sıra təhsil müəssisələri qatılıblar.
İntellektual oyunun nəticələrinə görə 11 nömrəli məktəbin "Hard Working” komandası I və "Penta” komandası II yeri, Füzuli rayon 7 saylı məktəbin "Qarabağ” komandası III yeri tutub.
Sumqayıt şəhər S.Vurğun adına Mərkəzi Kitabxanasında da Şəhər Mədəniyyət Evi ilə birgə tədbir keçirilib.
Tədbirdə mədəniyyət evinin qiraət dərnəyinin üzvlərinin və kitabxananın oxucularının ifasında ulu öndərə həsr olunmuş şeirlər səslənib, həyatı və fəaliyyəti haqqında geniş məlumat verilib, video çarx izlənilib.
Şəhər kitabxanalarında və klub müəssisələrində də ulu öndərə həsr olunmuş seminarlar keçirilib, kitab sərgiləri təşkil olunub.
Xəbərdən istifadə edərkən istinad etmək vacibdir.
