Ayrı-ayrı şəxslər tərəfindən qanunsuz valyuta mübadiləsi əməliyyatlarının aparılmasına qarşı məqsədyönlü mübarizə sahəsində daxili işlər orqanları tərəfindən xüsusi əməliyyat tədbirləri davam etdirilir.
Daxili İşlər Nazirliyinin (DİN) mətbuat xidmətindən bildiriblər ki, qurumun Baş Mütəşəkkil Cinayətkarlıqla Mübarizə İdarəsinin əməkdaşları tərəfindən daxil olmuş məlumat əsasında Xətai rayonu ərazisində yerləşən kafelərdən birində əməliyyat-axtarış tədbiri həyata keçirilib.
Nəticədə həmin obyektdə qanunsuz valyuta mübadilə fəaliyyəti ilə məşğul olan Masallı rayon sakini Elnur Əkbərov, paytaxt sakinləri Fərhad Məhərrəmov və Vüsal Mikayılov 52 min ABŞ dollarını 96 min 200 manata satan zaman saxlanılıblar. Onların üzərlərinə baxış zamanı əlavə olaraq, ümumilikdə 13 min 920 ABŞ dolları məbləğində pul vəsaiti aşkar olunub.
Faktla bağlı Baş İdarənin istintaq şöbəsində araşdırmalar davam etdirilir.
Həmin gün Sumqayıt şəhərində də müvafiq tədbir həyata keçirilib. Şəhər Polis İdarəsi əməkdaşları tərəfindən keçirilən əməliyyat tədbirləri nəticəsində Sumqayıtın 32-ci məhəlləsində yerləşən ticarət mərkəzinin ərazisində qanunsuz valyuta mübadiləsi fəaliyyəti ilə məşğul olduqlarına görə dörd nəfər - Fərmayıl Hacıyev, Xəqani Albandayev, Azər Məmmədov və İsfəndiyar Nağıyev saxlanılıblar. Tədbirlərin davam etdirilməsi nəticəsində bu fəaliyyətlə məşğul olan daha bir şəxs – Sumqayıt sakini İsmayıl Balayev də saxlanılıb.
Həmin şəxslər barəsində Azərbaycan Respublikası İnzibati Xətalar Məcəlləsinin müvafiq maddəsi ilə protokollar tərtib olunub.
DİN vətəndaşlara xəbərdarlıq edərək bildirir ki, ölkənin maliyyə sisteminin sabit və dayanıqlılığına, maliyyə bazarlarının fəaliyyətinin səmərəli şəkildə təmin olunmasına qarşı fəaliyyət göstərən şəxslərlə mübarizə tədbirləri bundan sonra da davam etdiriləcək. Odur ki, valyuta mübadiləsi ilə qanunsuz məşğul olan
şəxslərin bu hüquqazidd əməllərdən çəkinmələri tələb olunur.(AZƏRTAC)
Xəbərdən istifadə edərkən istinad etmək vacibdir.
