Bu il Sumqayıtın yaranmasının 65 ili tamam olur və bu münasibətlə Şəhər günü tədbirləri yüksək əhval-ruhiyə ilə, təntənəli şəkildə qeyd olunur.

Xeberle.com-un verdiyi məlumata görə, Sumqayıtda veloyürüş və at yarışı keçirilib. 22 sentyabr tarixində baş tutan yarışlarla bağlı Heydər Əliyev abidəsinin qarşısında geniş açılış mərasimi təşkil olundu. Tədbirdə karateçilərdən ibarət idmançı dəstələr döyüş səhnələri ilə zəngin olan nümunəvi çıxışlar etdilər. Çoxlu sayda Sumqayıt velosipedçilərinin iştirak etdiyi yarışda böyüklərlə yanaşı, uşaqlardan ibarət velosipedçilərin də yarışı keçirildi. Velosipedçilərdən sonra atlıların yarışına start verildi. Sonda qalib gələn iştirakçıların mükafatlandırma mərasimi keçirildi. Sumqayıtda veloyürüş və at yarışının keçirilməsi tədbiri izləyən minlərlə sakinin böyük marağına səbəb oldu.

Qeyd edək ki, şəhərin 65-ci ildönümü ilə bağlı tədbirlər planına uyğun olaraq sentyabrın 23-də Sumayıtda möhtəşəm Şəhər günü tədbirləri keçiriləcək. Sumqayıtın Şəhər günü bayram tədbirləri qədim Corat kəndindən başlayacaq. Burada qədim Corat qalasının yanında yaradılmış bazar meydanında şəhər gününə həsr olunmuş döyüş effektləri ilə dolu olan möhtəşəm səhnələşdirilmiş meydan tamaşası təqdim olunacaq. Bayram tədbirləri Corat qəsəbəsindən sonra Sumqayıtın mərkəzində - Bayraq meydanında təntənəli bayram keçidi ilə davam etdiriləcək. Tədbirdə hərbçilərin keçidi, idmançıların, motosikletçilərin, rayonlardan gələn kollektivlərin, retro maşınların, müxtəlif nağıl personajlarının, Rusiyanın Sankt-Peterburq şəhərinin “Barabançı qızlar”ının nümunəvi çıxışları, həmçinin helikopterlərin möhtəşəm avia-şousu olacaq. Bütöv bir günü əhatə edən “Şəhər günü” bayramı axşam saatlarında Azərbaycanın tanınmış incəsənət xadimlərinin konsert proqramı ilə davam edəcək və bayram tədbiri əsrarəngiz atəşfəşanlıqla yekunlaşacaq.

Xeberle.com