Regionların sosial-iqtisadi inkişafına dair Dövlət Proqramı Sumqayıt şəhərində uğurla həyata keçirilir. Görülən işlərin davamı olaraq küçə və parklarda yaşıllıqlar salınıb, Şəhidlər xiyabanı yenidən qurulub, Xocalı və 20 Yanvar abidə komplekslərində isə işlər tamamlanmaq üzrədir.
Son vaxtlar Sumqayıtda aparılan abadlıq və quruculuq işləri şəhərin simasını yaxşılığa doğru dəyişib. Sakinlərin asudə vaxtlarını səmərəli keçirmələri üçün park və xiyabanlarda yaşıllıqlar salınıb, dekorativ ağac və gül kolları əkilib. Getdikcə geniş vüsət alan bu işlər sayəsində Sumqayıt abad və yaşıllıqlarla zəngin şəhərə çevrilib.
Sentyabrın 20-də Nəsimi adına mədəniyyət və istirahət parkında və ümummilli lider Heydər Əliyevin adını daşıyan parkda şəhər rəhbərliyinin, idarə-müəssisə və təşkilat nümayəndələrinin iştirakı ilə ümumşəhər ağacəkmə aksiyası keçirilib. Üç min kvadratmetr ərazidə 1000-dən çox ağac əkilib. Yaşıllaşdırma aksiyasında 500-ə yaxın sakin iştirak edib.
Bununla yanaşı, şəhərin Şəhidlər Memorial Kompleksi cari ilin may ayından sökülərək yenidən qurulur. Hazırda burada tamamlanma işləri aparılır. Kompleksin tikintisində ağ mərmərdən istifadə olunub. Kompleksin arxa hissəsindəki park abadlaşdırılır, ətrafına qranitdən piltələr döşənir. Burada hündürlüyü 7 metr olan xatirə kompleksi yaradılıb.
Qanlı Yanvar və Xocalı faciəsi şəhidlərinin xatirəsinə ucaldılan abidə kompleksində də işlər sürətlə davam edir və ilin sonunadək bu layihənin inşası başa çatdırılacaq. Üç min kvadratmetr ərazidə inşa olunan bu komplekslər Sumqayıtın Şəhidlər xiyabanının qarşısında salınıb.
Həm respublika, həm də şəhər səviyyəli mədəni-kütləvi tədbirlərin keçirilməsi məqsədilə tikintisi başa çatan “Yaşıl teatr”ın inşasına bu ilin aprel ayında başlanılıb. Teatrın tamaşa zalı 350 nəfərlikdir. “Yaşıl teatr”da ən son texnologiyalara əsaslanan səs və işıq sistemləri qurulub. Teatrın ümumi sahəsi min kvadratmetrə yaxındır. Nəsimi adına mədəniyyət və istirahət parkında yeni fəvvarə tikilib və ətrafına tamet döşənib. İstirahət parkındakı rəmzi “Görüş körpüsu” adlandırılan körpü isə əsaslı və zövq oxşayan şəkildə təmir olunaraq yenidən Sumqayıt sakinlərinin istifadəsinə verilib. (azertag.com)