Brüsseldə MiniEuropa deyilən park var. 24 000 kv.м ərazidə Avropa Birliyinə daxil olan ölkələrin 80 şəhərinin 350-yə qədər tikilisi maket şəklində yerləşdirilib. Eyfel qülləsindən tutmuş Biq Benə qədər, Berlin divarlarından tutmuş Afina akropoluna qədər turistlər üçün maraq kəsb edən bütün cəlbedici tikililər maket şəklində həmin parkda yerləşdirilib. Bu parkda hətta Vezuviy vulkanına da rast gəlmək olar. Təbii ki hər biri 25 dəfə kiçildilmiş şəkildə.

Oxu.Az xəbər verir ki, bu barədə “İqtisadi təşəbbüsə dəstək” İB-nin eksperti Samir Əliyev deyib.

Ekspertin sözlərinə görə, bunun Azərbaycanda da yaradılması imkanları barədə düşünməyə dəyər: 

“Düzdür, belə təşəbbüslər var. Bakıda qış bulvarı adlanan parkda müvəqqəti də olsa Azərbaycanın tarixi abidələrindən ibarət maketlər quraşdırılır. Ola bilsin başqa ərazidə də belə maketlər var. Buna sözüm yoxdur. Amma yaxşı olardı Şuşa parkı yaradılsın və həmin parkda Şuşada yerləşən bütün tarixi abidələr yerləşdirilsin. Bir tərəfdə kiril əlifbası ilə “Шуша” yazılmış qala, Xan sarayı, Pənah xanın sarayı, digər tərəfdən Natəvanın, Üzeyir Hacıbəyovun və Bülbülün ev muzeyləri. Onların arasında İsa bulağı və s.”.

“Bu parka girəndə insan özünü bir anlığa Şuşada hiss etməlidir. İnsanlar Şuşa restoranı, şadlıq evi yox, əsl Şuşanı görməlidir. Təkcə, Şuşa yox, digər rayonlar üzrə də parklar yaratmaq olar”, - deyib S.Əliyev.