Sumqayıtda “İnsan alveri ilə mübarizədə media işçilərin rolu” mövzusunda təlim keçirilib

Sumqayıtda “İnsan alveri ilə mübarizədə media işçilərin rolu” mövzusunda təlim keçirilib - FOTO

Tarix: 27-12-2016, 12:37 Oxunma sayı: 1 700 Bölmə: Cəmiyyət / Sumqayıt

Sumqayıtda Xeberle.com saytı ("Xəbərlə” MMC) və "168 saat” qəzetinin təşkilatçılığı ilə "Sumqayıt şəhəri və yaxın regionlarda insan alverinə qarşı mübarizə sahəsində ictimai dəstəyin gücləndirilməsinə yönəlmiş tədbirlər” layihəsi çərçivəsində "İnsan alveri ilə mübarizədə media işçilərin rolu” mövzusunda təlim keçirilib.

Bu layihə ABŞ Dövlət Departamentinin maliyyə dəstəyi ilə Beynəlxalq Miqrasiya Təşkilatının Azərbaycandakı Nümayəndəliyi tərəfindən həyata keçirilən "Azərbaycanda potensialların artırılması və texniki dəstək vasitəsilə insan alverinə qarşı mübarizənin səmərəliyi üçün əməkdaşlığın gücləndirilməsi – IV Faza” Layihəsi çərçivəsində reallaşıb.

KİV təmsilçilərinin iştirak etdiyi təlimdə "Xeberle.com” saytının redaktoru, layihə rəhbəri Ramil Zeynallı layihənin mahiyyəti, məqsədləri barədə iştirakçılara ətraflı məlumat verib.

Təlimin məqsədi insan alveri qurbanlarının məxfiliyinin qorunması qaydalarının öyrədilməsi, insan alveri mövzularında yazılan məqalələrin və qurbanlarla müsahibələrin aparılma qaydaları haqqında KİV nümayəndələrini maarifləndirməkdir.

Ekspert qismində Azərbaycan Respublikasının Əmək və Əhalinin Sosial Müdafiə Nazirliyinin İnsan alverinə qarşı mübarizə Mərkəzinin rəhbəri Nəzakət Xudiyeva iştirak edib.

Nəzakət Xudiyeva iştirakçılara ilk öncə İnsan alveri ilə mübarizədə media işçilərin rolundan, bu sahədə qanunvericilik toplusundan geniş məlumat vermişdir. Ekspert həmçinin insan alveri qurbanları və potensial qurbanlar haqqında təlim iştirakçılarına geniş məlumat verib, insan alverinin və qanunsuz miqrasiya fenomeninin kütləvi informasiya vasitələrində işıqlandırılması barəsində danışıb.

O, KİV nümayəndələrinin insan alveri qurbanları və potensial insan alveri qurbanları haqqında məlumat yayımlayarkən onların həssas və tolerant yanaşmasının vacibliyini iştirakçıların diqqətinə çatdırıb.

İnteraktiv formada keçirilən təlim zamanı 3 qısa metrajlı filmlər göstərilib, hər bir iştirakçı təlim materialları ilə təmin edilib. İştirakçıların sualları ekspert tərəfindən geniş cavablandırılıb.

Sonda təlimin qiymətləndirilməsinə dair sorğular keçirilib. Sorğularda iştirak etmiş iştirakçıların çox qismi təlim mövzusunun aktual olduğunu qeyd edib.