Sumqayıtda "Fun world” adlı əyləncə mərkəzinin açılışı olub. 9-cu mikrorayon, Heydər Əliyev parkının çıxışına yaxın yerləşən mərkəz 3 mərtəbəlidir. 1-ci və 2-ci mərtəbəsi müxtəlif əyləncə aparatları ilə dolu oyun zalından ibarətdir. Həmçinin 1-ci mərtəbədə "fast food” kafe, 2-ci mərtəbədə isə karaoke otağı və uşaqlar üçün banket zalı fəaliyyət göstərir. Mərkəzin 3-cü mərtəbəsi isə böyük restorandır. Burada Azərbaycan, Türkiyə, Avropa mətbəxinin ən ləziz təamları müştərilərə təklif edilir. Restoranın ən son qatı isə yay terrasıdır. Burada isti aylarda istirahət etmək mümkün olacaq.
Bu gün açılışı təşkil olunan "Fun world” əyləncə mərkəzində böyük izdiham müşahidə olunub. Mərkəzin sahiblərindən biri Xeberle.com-a söyləyib: "Cənab prezidentin sahibkarlara dəstəyini görəndən sonra qərara gəldik ki, belə bir əyləncə mərkəzi açaq və mütləq Sumqayıtda. Çünki şəhərimizdə belə bir əyləncə mərkəzi yox idi və sakinlərimiz çox zaman ailəvi olaraq Bakıya üz tutmalı olurdular. Bu artıq vaxt itkisi idi. Üstəlik, maddi baxımdan da baha başa gəlirdi. Və budur, artıq əyləncə mərkəzi bu gündən istifadəyə verilib. Ümidvarıq ki, Sumqayıtda belə bir məkanın mövcudluğunu eşidən hər bir kəs buraya təşrif buyuraraq dincələ, əylənə biləcək. Uşaqlar üçün hər cür şərait yaradılıb. Həm müxtəlif oyun aparatları, həm çeşidli qidalar, həm də əlamətdar və bayram günlərinin qeyd edilməsi üçün banket zalı. Bura əsl ailəvi bir məkandır".
Sumqayıtın hər bir yerindən sakinlər xüsusən uşaqları ilə bu açılışda iştirak edib, mərkəzin təklif etdiyi xidmətlərdən yararlanıblar. Açılşıda iştirak edən hər bir müştəriyə pulsuz kart təqdim edilib. Qeyd edək ki, həmin kart digər günlərdə ödənişli olacaq. Oyun aparatlarının və kafenin qarşısında böyük növbələr yaranıb. Daha çox ailəvi gələn sumqayıtlılar mərkəzin açılışından məmnunluq duyublar. "Fun world”un qarşısında isə böyük səhnə qurulub, estradamızın ulduzlarının iştirakı ilə konsert proqramı təşkil edilib. Tədbir böyük atəşfəşanlıq ilə sona çatıb.
Xeberle.com