Sumqayıt şəhər sakini Sədaqət Vəzirəliyeva Daxili İşlər Nazirliyinin 102 zəng mərkəzinə müraciət edərək dekabrın 25-də şəhər ərazisində yerləşən ticarət mərkəzlərindən birində olan zaman naməlum şəxsin onun cibindən içərisində 500 manat pul, plastik kart və şəxsiyyət vəsiqəsi olan pul kisəsini oğurladığını bildirib.
ARB TV xəbər verir ki, polis idarəsi əməkdaşlarının keçirdikləri əməliyyat-axtarış tədbirləri nəticəsində əvvəllər oğurluq etdiyinə görə 4 dəfə məhkum edilmiş Mürvət Quliyev şübhəli şəxs qismində saxlanılaraq istintaqa təhvil verilib.
Sumqayıt polisi daha bir uğurlu əməliyyat keçirib.
Şəhər Polis İdarəsi cinayət-axtarış şöbəsi əməkdaşlarının apardıqları tədbir nəticəsində ictimai nəqliyyatda cibgirlik edən, əvvəllər dəfələrlə məhkum olunmuş Səxavət Həsənov saxlanılıb.
Araşdırma zamanı məlum olub ki, Həsənov Sumqayıt şəhəri ərazisində "10 a" marşrut xətti üzrə hərəkətdə olan sərnişin avtobusunda şəhər sakini Mənzər Əliyevanın gödəkçəsinin cibindən 1 ədəd mobil telefon oğurlayıb. Oğurlanan telefon Həsənovun üzərindən aşkar edilərək maddi sübut kimi götürülüb. Polis əməkdaşları cibgirlik etdikləri üçün saxlanılan şəxslərin digər cinayətlərdə iştirakını istisna etmirlər.
Onların əməlindən əziyyət çəkən başqa vətəndaşlar varsa, bu barədə DİN-in 102 zəng mərkəzinə və ya Sumqayıt Şəhər Polis İdarəsinə müraciət edə bilərlər.
Sumqayıt ərazində oğurluq edən, əvvəllər məhkum olunmuş Elvin Nəsurullayev də saxlanılıb.
Onun həmyerliləri əvvəllər məhkum edilmiş Hikmət Fərəcov, Həsən Mehdiyev və Asim Abbasovla birgə oktyabrın 22-dən dekabrın 7-dək olan müddətdə şəhər ərazisində 11 evdən və 1 qarajdan tikinti alətləri, qızıl və məişət əşyaları oğurladığı da müəyyən edilib. Dəstənin digər üzvləri saxlanılaraq istintaqa təqdim ediliblər. İlkin dindirilmə zamanı şəxslər əməllərini etiraf ediblər.
Asim Abbasov - Saxlanılan şəxs: "Corat bağları, Novxanı tərəf və Xəzər bağlarında. Bina evləri olmayıb, ancaq həyət evlərində. Kombi, kondisaner, tikinti alətləri və elektrik naqilləri götürüb satıb, pulları da 4 nəfər arasında bölmüşük".
Həsən Mehdiyev - Saxlanılan şəxs: "Tikinti alətlərini götürüb satmışıq. Saat 7 və ya 8-də gedirdik, işıq yanmırdısa, girirdik içəri. Götürdüklərimizi çıxıb boş həyətə qoyub, səhər gedib satırdıq".
Qeyd edilən faktlarla bağlı cinayət işi açılıb, araşdırmalar aparılır.
Xəbərdən istifadə edərkən istinad etmək vacibdir.
