"Qarabağ dünən, Qarabağ bugün,Qarabağ sabah" adlı film ictimaiyyətə təqdim olundu. 30 dəqiqəlik ekran işi işğal altında olan torpaqlarımızda ermənilərin törətdiyi vəhşiliklər foto və video faktlarla tamaşaçılara çatdırılıb. Filmdə ermənilərin əsrlər boyu azərbaycanlıların başına gətirdiyi zülmdən, onların işğal etdikləri Qarabağımızda həyata keçirdiyi vandallıq və etnik təmizləmədən bəhs olunur. Gənclərdə vətənpərvərlik hisslərini aşılayan film maraqlı sujet xəttinə malikdir. Filmin təkcə respublikadaxili deyil, həmçinin Rusiya,Ukrayna, Polşa, Türkiyə kimi ölkələrdə nümayiş olunacağı planlaşdırılır. Hazırda ekran işinin rus, ingilis və türk dillərinə tərcümə edilməsinə başlanılıb. Qarabağ tarixinin müqayisəli təhlilinə həsr olunan filmdə bir çox tanınmış şəxslərin müsahibələri də yer alıb. Ekran işində ermənilərin iç üzü ifşa edilməklə yanaşı, həmçinin onlara qarşı mübarizə üsullarından da danışılır. Sonda filmin ərsəyə gəlməsində xüsusi xidmətləri olan "Arb24” telekanalının əməkdaşlarına təşəkkürnamələr təqdim olundu.
Onu da deyək ki, layihə Azərbaycan-Slavyan Gəncləri Assosiasiyası, Azərbaycan Respublikasının Prezidenti yanında Gənclər Fondu və "Arb24” telekanalının birgə təşəbbüsü ilə ərsəyə gəlib.
Xəbərdən istifadə edərkən istinad etmək vacibdir.
