Ötən əsrin sonlarında baş vermiş cinsi azlıqların inqilabından sonra, əslində ta qədimdən bəri mövcud olan eynicinsli münasibətlər açığa çıxarılmağa başladı. Bu məsələnin niyə gün işığına çıxarıldığı, sözügedən inqilabın özü haqqında sosioloqlar, psixoloqlar, ümumiyyətlə peşəsinə aid oldu-olmadı istənilən düşüncə sahibi fikir söylədi. Ənənəvi cinsi ilə razılaşmayan azlıqları "xəstə”, "fərqli”, "müstəqil seçim hüquqlu”, "üzdəniraq”  və.s kimi söz ehtiyatımızda olan-olmayan ifadələrlə səciyyələndirdilər. İctimai qınaq çoxluq təşkil etsə də bu hərəkata onun təsiri yel qayadan apara biləcəyi qədər oldu. Və nəhayət cinsi azlıqlar özlərini cəmiyyətə qismən də olsa qəbul etdirib, normal münasibətə yaxınlaşa bildilər. İndi hər birimizin işlədiyimiz, yaşadığımız, oxuduğumuz yerlərdə dəyişik oriyentasiyalı tanıdıqlarımız var, buna görə onları gizli-aşkaq qınasaq da, hər halda "gözün üstə qaşın var” demirik.

Amma dəmirə düşmüş pas əvvəl-axır dəmiri tamamilə "yediyi” kimi, cəmiyyətdə olan bu "fərqli”lər artıq artmağa, yayılmağa başlarsa, o dəmir əlbəttə ki, çürüməyə məruz qalacaq. Sonucda isə məşhur tamaşada deyildiyi kimi,  çürüntülü "cəmiyyətimiz turş dadmağa” başlayacaq.  

Həyəcan siqnalının düyməsinə əlimi uzadanlardan biri kimi deməliyəm ki, son zamanlarda cinsi azlıqların fəallaşması, onların məlum inqilablarından bu yana ən aktiv günlərini yaşayır. Son bir həftədə Azərbaycanda iki eynicinsli cütlüyün münasibətlərinə nişan və toy mərasimi ilə "ad verməsi”, onların daha sıx bir araya gəlməsini müşahidə etdik. Əvvəlcə qeyri-ənənəvi nişan mərasiminin təşkil edilməsi barədə xəbər yayıldı. Belə ki, Nəfəs LGBT (lezbiyan, gey, biseksual, transeksual) Azərbaycan Alyansının prezidenti Atilla Bəy Cavid eynicinsli "sevgilisi” ilə nişanlandığını şəxsi facebook səhifəsində bəyan etdi.  Onun kimi cəmiyyəti "homofob” adlandıran digər cütlüyün "xeyir iş” xəbəri isə balıqçıdan gəldi. Yox, bu Puşkinin balıqçısı olmasa da, toruna qızıl balığı salıb arzularından birini, bəlkə də ən böyüyünü həyata keçirə bilib – eynicinsli sevgilisi ilə toy eləməyi planlaşdırır. "Qızıl balıq” isə 23 yaşlı Nigar adlı qızdır. Təxminən 30 yaşı olan Samirə adlı qadın onu qaçırıb və 3 aya yaxındır birgə yaşayandan sonra toy etmək qərarına gəliblər. Samirə Nabranda balıqçılıqla məşğuldur və hər kəs onu "balıqçı Samirə” kimi tanıyır.

 Sevgidə cins tanımayanlardan bir xəbər də elə ötən gün Türkiyədən gəldi. Ekin Kəsər və Əmrullah Yavuz adlı oğlanlar sentyabrın əvvəlində toy eləsələr də, bu toyun səsi ötən gün çıxıb (həm də azəri həmfikirlərinin toy-nişan günlərində!)

Maraqlıdır ki, bənzər xəbərlər məhz bu ay sürətlə yayılmağa başlayıb. Bilmirəm, bu fəsil dəyişimindəndimi, Payız romantikasıdımı, hər halda sentyabr homoseksuallar üçün düşərli olub. (məhsul bolluğu fəslidir axı!)

Elə qardaş Türkiyəylə bağlı daha bir xəbər də diqqətimi çəkdi: deməli, Türkiyənin Manisa bölgəsindəki kəndlərdən birində qadın paltarında gəzən və xalq arasında "Ehsan xala” adı ilə tanınan kişidən söz açılır. Elə hərtərəfli qadın işləriylə (cinsi, fiziki, məişət) məşğul olan bu kişi haqqında danışılarkən, yerli camaatın onu necə sevdiyini, ailələrinin üzvü olduğunu, bir sözlə "xala”nın həmin kənddə mövcudluğundan "mutlu” olduqlarını dilə gətirirlər.

Qaynar su vedrəsi effekti verən daha bir məlumat isə Rusiyadan gəldi. Elə cinsi azlıqların tərəfində olan bəzi cinsi çoxluqların vasitəsilə Rusiyadakı homoseksualların manifesti ortaya atıldı. Manifestdən çox hədə-qorxuya bənzəyən bu yazılı müraciətdəki bəzi abzasları diqqətinizə çatdırıram: 

"Biz dünyanı dəyişəcəyik: homoseksuallar haqqında şeirlər, romanlar yazılacaq, mahnılar bəstələnəcək, filmlər çəkiləcək. Yeni nəsil orta və aşağı təbəqə tanımayacaq. "Mavi qanlı” kübar homoseksuallar dünyanı idarə edəcəklər. Dini məbədlər ləğv ediləcək. Tək allahımız simvolik gənc və gözəl kişi olacaq. Bizə qədər olan tarixdən hetereseksual üstünlük silinəcək. Qalib biz olacağıq”. (P.S Bu hələ təmizlənmiş, "abıra salınmış” bir hissədir.)

Həzərat, nə baş verir?! Doğrudanmı hökmranlıq homoseksuallara keçir?! Cinsi azlıq çoxluq olarsa... nəylə nəticələnəcəyini təxmin etmək üçün ekstasens olmağa ehtiyac yoxdur.

Elə isə son günlərdə baş verənlər təsadüfdümü, təxribatdımı, siyasətdimi, ən azından mütəxəssis dilindən eşidək:

"Təmiz Dünya” İctimai Birliyinin sədri, psixoloq Mehriban Zeynalova deyir ki, indiyə qədər  bu, şəxsi məsələ olub. Proses gizli olub və bu kateqoriyadan olanlar öz həmcinsləri ilə birgə həyat yaşayıblar: "Lakin son dövrlər Avropa Şurası bunu siyasətə cevirib. Belə ki, Avropa Şurasının bəzi konvensiya və direktivlərində bu məsələlər prioritet kimi qoyulur və ölkələrdən qəbulu tələb olunur. Halbuki BMT konvensiyalarında ölkənin milli adət-ənənələri prioritet götürüldüyü halda, Avropa Şurası bunu qəbul etmir, əksinə öz şərtini irəli sürür. Yaxın vaxtlara kimi bəzi hallarda ölkələr bundan yan keçə bilirdi. Lakin son dövrdə Avropa bu yankeçmələrə məhəl qoymur və bəzi direktivlərində bunu ciddi tələb kimi hökumətin qarşısına öhdəlik olaraq irəli sürür. Odur ki, baş verən hadisələr heç də kortəbii proseslər deyil, bu hadisilər konkret siyasətin nəticəsidir”.

Psixoseksual Konsultasiya və Bərpa Mərkəzinin rəhbəri, psixoloq Ramil Nəcəfli bildirir ki, eyni cinsdən olan şəxslərin öz həmcinslərinə qarşı sevgi hissiyatı, seksual münasibətləri bütün tarix boyu baş verib: "Hətta dünya miqyasında bəlkə də "mentalitet " sözünün ən çox işlədildiyi Azərbaycanda da homoseksual əlaqələr barədə məlumatlara tarix boyu və elə indi də rast gəlirik. Biz təəssüf ki, bir tərəfdən homoseksualizmi pisləyirik, mentalitetdən dəm vururuq, digər tərəfdən hərbi hissələrdə, həbsxanalarda kişilərin homoseksual əlaqələrinin qarşısını ala bilmirik. Tarix boyu milli mentalitetimizi formalaşdıranların sırasına daxil olan padşahlarımız, sultanlarımız, varlı adamlarımız şəhərləri, kəndləri gəzərkən harda gözəl-göyçək oğlan görsəydilər, zorla onları saraylarına aparıb, kişilikdən məhrum edərək hərəmxana xacəsi kimi yetişdirirdilər. Və ya yaraşıqlı, gözəl oğlanları öz saraylarında müxtəlif xidmətçi işlərinə götürürdülər. Ümumiyyətlə, təkcə Azərbaycanda deyil, müsəlman şərqində eynicinsli məhəbbət barədə çox misallar gətirmək olar. Bu da o deməkdir ki, belə hallar anormal olsa da bizə yad deyil. Reallıqlardan qaçmaq olmur. Bu hisslər müxtəlif əsərlərdə də öz əksini tapıb”.

Göründüyü kimi, bu cərəyan elə mütəxəssislər tərəfindən də bəla, problem, normal hadisə kimi hər cür sözlə izah olunur. Amma bu izahların arxasından boylanan bir şübhə də var...

Dilimizdə "ingilis barmağı” ifadəsi geniş yayılıb. Bu ifadə ötən əsrin əvvəllərində İngiltərə imperilistlərinin Azərbaycana müdaxilələri zamanı formalaşıb və baş verən hansısa qəfil bir hadisənin, məkrli bir siyasətin məhz onlar tərəfindən hazırlandığını bildirmək məqsədi ilə işlədilirdi. Elə indi də ifadə öz aktuallığını itirməyib. "İngilis” sözü burda ümumiləşmiş addır, bütövlükdə Qərb və onun siyasəti nəzərdə tutulur.

Yadıma Cəlil Mәmmәdquluzadәnin «Barmaq» felyetonu düşdü: «Necә ki, Allaһ-taala һәmişә dünyada olubdur, һabelә ingilis barmağı da dünya yaranandan indiyәdәk һәr yerdә olub.

Mәsәlәn, o günü bir yerdә belә söһbәt var idi: tarixşünaslar indi bunu isbat ediblәr ki, Adәm övladı Qabil ilә Habilin dalaşmağında vә Qabilin Habili qәtlә yetirmәyindә ingilis barmağı var imiş...

Onunçün dә mәn dünyada һәr bir әsrdә vaqe olan cəncəl işlәrin һamısını ingilis barmağında görürәm... Hətta bәzi vaxt evdә arvadla bir balaca sözümüz çəp gәlәndә deyirәm: lәnәt şeytana! Yәqin ki, yenә zalım oğlu ingilis barmağını qarışdırdı!

Onunçün dә evdә bir para işә acığım tutanda dәxi «lәnәt şeytana!» demirәm, «lәnәt ingilis barmağına!» deyirәm».

İndi yalan-doğru bu eynicinsli inqilabda da ingilis barmağı olmasın? İngilis də olmasa onun müttəfiqlərinin barmağı elə açıq-aydın görünür ki, daha şübhəyə nə hacət?

Elə rus tarixçi və siyasətçiləri də iddia edirlər ki, cinsəl mövzuları, çirkin fantaziyaları ortaya atan Qərbdi. Məqsəd eynicinslilik sayəsində demoqrafiyanın aşağı düşməsi, cinsi xəstəliklərin artması nəticəsində insanların məhvi, nəticədə dünya əhalisinin sayının azalmasıdır. Yəni "qızıl milyardlığa” çatdırılmasıdır. Bununsa arxasında "azad bənnalar”ın (masonlar) dayandığı iddia edilir. Gördüyünüz kimi nə qədər çox qurdalasaq, bir o qədər dünyanın qaranlıq üzü işıqlanır, ucu uzandıqca uzanır. Elə burda nöqtələyək ki, kələfin ucu itməsin. Amma bir şey həqiqətdir ki, bu xəmir hələ çox su aparacaq.(adalet.az)