Bu "civar"ı kim soxuşdurdu qəzet-jurnal səhifələrinə, radio-televiziyaya, baş açmaq olmur. İndicə yenə bir saytda oxudum: "Bir ay ərzində - dolların məzənnəsi bu CİVARda olacaq.
Guya dilimizi ərəb-fars sözlərindən təmizləməyə çaışanlar (bu, heç vaxt mümkün olmayacaq! - dilimizin 40-50 faizini həmin sözlər təşkil edir) söz kasadlıqları üzündən özlərinin kənd-rayon sözlərini "dartıb-sürüyüb" ədəbi dilimizə gətirib qatırlar. Baxın 10-15 il əvvəlki qəzet-jurnallara, görün bu "civar" oralarda varmı? Həmişə deyilib ki, məsələn, 10 manat dəyərində (məbləğində, həddində, miqdarında, həcmində və s.) Hərə öz kəndinin-kəsəyinin bu və ya digər sözlərini, anlaşılmaz, bir az da kobud səslənən türk kəlmələrini ədəbi dilimizə dartıb-gətirmək istəsə, daha ədəbi dil olmayacaq ki. Onda mən yalnız Şəki-Oğuz tərəfin 100-ə yaxın sözünü, o birisi Qax-Balakən tərəfin və digər rayonlarımızın sözlərini yazı-pozuya gətirsək, onda nə olacaq? Hətta mahnılarımıza da yerli söz, şivə qatmağa çalışanlar da var. Onsuz da xoşuma gəlməyən, primitiv sevgini ifadə edən, "qadanı mən alım" kimi sözləri olan mahnıda "qadanı" əvəzinə "qadoyu" demək bəzi müğənnilər üçün xoş olsa da, heç də hamı üçün xoş deyil və çox bayağı səslənir. Qısası, gəlin ədəbi dilimizin başına oyun aşmayaq, onun təmizliyini qoruyaq.
Rəhman ORXAN
Xəbərdən istifadə edərkən istinad etmək vacibdir.
