Xəbər verdiyimiz kimi, fevralın 17-də saat 17:20-də Qaradağ rayonu "Pirsaat" qəsəbəsi ərazisində dənizdə, sahildən 1 mil aralı məsafədə şəxsiyyəti naməlum kişi meyidi aşkarlanıb.
Tapılan meyidin "Azneft" İB-nin N.Nərimanov adına Neft Qaz Çıxarma İdarəsinin 3 saylı Neft Yığım Məntəqəsinin estakadasının uçması zamanı itkin düşən neftçilərə aid olub-olmaması araşdırılıb.
Məhkəmə Tibbi Ekspertiza və Patoloji Anatomiya Birliyində meyitin itkin neftçi 1957-ci il təvəllüdlü Qurbanov Vidadi Cümşüd oğluna məxsus olduğu müəyyən edilib. Ailə üzvləri cəsədin ona məxsus olduğunu təsdiqləyiblər.
Milli.Az yeniçağ.az-a istinadən bildirir ki, əslən Tərtər rayonunun Düyərli kəndindən olan Qurbanov Vidadi Cümşüd oğlu Sumqayıt şəhər sakini olub. O, SOCAR-ın "Azneft" İstehsalat Birliyinin N.Nərimanov adına Neft-Qaz Çıxarma İdarəsinin 3 saylı neft yığım məntəqəsinin sağ və sol hissəsində yerləşən estakadanın uçması nəticəsində dənizdə itkin düşən 10 nəfərdən biridir. Qurbanov Vidadi 2 oğul atası idi. 59 yaşlı Vidadi 36 il neft-qaz sahəsində çalışıb və ömrünü bu sahəyə həsr edib.
Azərbaycan Sənaye İnstitutunu bitirən Vidadi Qurbanov bir müddət Türkmənistanda işləyib. 1992-ci ildən isə Sumqayıtda yaşayıb.

Xəbərdən istifadə edərkən istinad etmək vacibdir.