Dövlət İmtahan Mərkəzi (DİM) tərəfindən fevralın 17-dən 22-dək "ASAN xidmət” könüllüləri və Qərb Universitetinin əməkdaşları üçün seminar-məşğələlər keçirilib.
Dövlət İmtahan Mərkəzindən bildiriblər ki, imtahan prosesinə cəlb olunmaq üçün "ASAN xidmət”in Bakı şəhərində yerləşən 4 mərkəzi, həmçinin Sumqayıt, Gəncə, Sabirabad, Bərdə, Masallı, Qəbələ mərkəzləri üzrə ümumilikdə 227 könüllüsü və Qərb Universitetinin 38 əməkdaşı DİM-in keçirdiyi təlimlərdə iştirak edib.
DİM- in məsul şəxsləri tərəfindən aparılan seminarlarda iştirakçıların imtahan prosesi ilə əyani şəkildə tanış olması məqsədilə imtahan texnologiyasına aid film nümayiş etdirilib, imtahanın gedişi ilə bağlı qaydalar izah olunub. Bu zaman real imtahanda tətbiq edilən sənədlər və vəsaitlərdən istifadə edilib.
Qeyd edək ki, 2016-cı il 30 yanvar tarixində Tələbə Qəbulu üzrə Dövlət Komissiyasının (TQDK) sədri Məleykə Abbaszadə ilə "ASAN School” könüllülük proqramının "İnnovativ idarəetmə” layihəsi çərçivəsində keçirilən görüşdə "ASAN xidmət” könüllülərinin TQDK-nın (DİM-in) keçirdiyi imtahanlarda nəzarətçi kimi iştirakına qərar verilib. Ötən il TQDK tərəfindən keçirilən buraxılış imtahanlarına 192, qəbul imtahanlarına isə 118 "ASAN xidmət” könüllüsü cəlb olunub.
AZƏRTAC
Xəbərdən istifadə edərkən istinad etmək vacibdir.
