Azərbaycan Respublikasının Prezidenti yanında Mənzil İnşaatı Dövlət Agentliyi (MİDA) ölkə vətəndaşlarının güzəştli mənzillərlə bağlı suallarının "ASAN xidmət” mərkəzlərində cavablandırılması prosesini uğurla davam etdirir.
 Bu haqda MİDA-nın mətbuat xidmətindən Xeberle.com-a verilən məlumatada bildirilib.
"Güzəştli mənzil” elektron sistemi fəaliyyətə başlayanadək vətəndaşların rahatlığını təmin etmək məqsədilə 10 mart tarixindən etibarən sistemin əsas prinsipləri barədə məlumatlandırılma işi Bakı şəhərində yerləşən 1, 3 və 5 saylı "ASAN xidmət” mərkəzlərində, habelə Sumqayıt "ASAN xidmət” mərkəzində həyata keçirilir. "ASAN xidmət” mərkəzlərinə gələ bilməyən vətəndaşlara isə "108” Çağrı mərkəzi vasitəsilə xidmət göstərilir.
Qeyd edilib ki, müraciətlərin qəbulu işinin səmərəli təşkili məqsədilə müsabiqə əsasında seçilmiş və Agentliyin təşkil etdiyi xüsusi təlimlərdə iştirak etmiş gənc kadrlar işə cəlb olunub.
Agentliyin tabeliyində fəaliyyət göstərən "MİDA” MMC-nin və "ASAN xidmət”in əməkdaşlığı nəticəsində ilk 3 gün ərzində ümumilikdə 2572 vətəndaşa xidmət göstərilib. Onlardan 1735 nəfər "ASAN xidmət” mərkəzlərinə, 837 nəfər isə "108” Çağrı mərkəzinə müraciət edib.

Xəbərdən istifadə edərkən istinad etmək vacibdir.