Azərbaycan
metallurgiyasının veteranı, keçmiş nazir Tofiq Həsənov bu gün səhər dünyasını
dəyişib
Sumqayıt ictimaiyyətinə
ağır itki üz vermişdir. Azərbaycan metallurgiyasının veteranı, uzun illər
Sumqayıt Alüminium zavodunun direktoru olmuş, sonralar respublikanın
"Metallurgiya” Dövlət Şirkətinə rəhbərlik etmiş Tofiq Heydər oğlu Həsənov bu
gün - aprelin 1-də vəfat etmişdir.
...1934-cü ildə Gəncə şəhərində dünyaya gəlmiş Tofiq Həsənov 1952-ci ildə Gəncə
dəmiryol məktəbini gümüş medalla bitirərək, elə həmin il Azərbaycan Neft və Kimya
İnstitutunun (Neft Akademiyasının) neft-mədən fakültəsinə daxil olmuşdur.
1958-ci ildə ali təhsilli gənc mühəndis kimi təyinatla o vaxtkı "Artyomneft”ə
göndərilmiş və orada fəhlə-qazmaçı kimi əmək fəaliyyətinə başlamışdır. 1960-cı
ildə Sumqayıta gələrək, Alüminium zavodunda işə düzəlmiş və ən çətin
istehsalatda – elektroliz sexində usta köməkçisi kimi çalışmış, sonralar usta, baş usta, 1969-cu ildən isə zavodun
texniki şöbəsinin rəisi vəzifələrində işləmişdir.
Mühəndis kimi istedadı və işgüzarlığı nəzərə alınaraq, 1972-ci ildə - 38
yaşında olarkən ona yüksək etimad göstərilərək, Sumqayıt şəhər Partiya
Komitəsinin sənaye və nəqliyyat şöbəsinin müdiri vəzifəsinə təyin edilmişdi.
Sonrakı illərdə Tofiq müəllim Sumqayıt Alüminium zavodunun direktoru,
"Əlvanmetallurgiya” İstehsalat İdarəsinin rəis müavini vəzifələrində səmərəli
fəaliyyət göstərmiş, 1994-cü ildən isə respublikanın "Metallurgiya” Dövlət
Şirkətinə rəhbərlik etmişdir. Məhz onun yüksək idarəçilik və təşkilatçılıq
bacarığı, prinsipiallığı sayəsində Azərbaycan metallurgiya sənayesi ötən əsrin
90-cı illərində Moskvanın məruz qoymağa çalışdığı dərin maliyyə böhranından
xilas ola bilmişdi.
Tofiq Həsənovun səmərəli
əmək fəaliyyəti 1980-ci ildə ulu öndər Heydər Əliyev tərəfindən yüksək
qiymətləndirilmiş və o, "Şərəf nişanı” ordeni ilə təltif edilmişdir.
57 il qoynunda yaşayaraq, bütün mənalı həyatını həsr etdiyi Sumqayıtda o, həm
təcrübəli mühəndis-metallurq, həm də əsl ziyalı, gözəl və səmimi bir insan kimi
tanınırdı və şəhərdə dərin hörmət və nüfuza malik idi.
Təvazökarlığı, mənəvi saflığı ilə seçilən, böyük və mənalı ömür yolu keçmiş Tofiq müəllimin 3-7 mərasimi aprelin 3-də şəhərimizin 18-ci məhəlləsində, C.Cabbarlı adına Mədəniyyət evinin qarşısındakı Məclis evində keçiriləcəkdir.
Allah rəhmət eləsin!
Rəhman Orxan
Xeberle.com
P.S. Xeberle.com kollektivi də mərhumun vəfatından kədərləndiyini bildirir və onun yaxınlarına başsağlığı verir.
Xəbərdən istifadə edərkən istinad etmək vacibdir.
