Azərbaycanda yüksək vəzifələr tutan məmurların, tanınmış simaların övladları ilə bağlı məlumatlar tez-tez media vasitəsilə gündəmə gəlir, kimisi haqda yaxşı sözlər danışılır, kimisi barədə isə əksinə... 
Cəmiyyətin bütün təbəqələri kimi, vəzifəli şəxslərin, məşhurların övladları arasında nümunəvi davranışları ilə seçilənlər də var və təbii ki, bunun əksinə olanlar da... Ümumiyyətlə məmurların və məşhurların övladları haqqında bilgilər ictimaiyyətə də həmişə maraqlı gəlib - onlar kimdirlər, harda çalışır, nə işlərlə məşğuldurlar...

Modern.az saytı “Məşhurların övladları” adlı rubrikasında ictimai, siyasi xadimlərin, mədəniyyət, ədəbiyyat, idman və digər sahələrdə tanınmış simaların övladları haqda bilgilərin təqdimatını davam etdirir. 

Budəfəki təqdimatımız Azərbaycanın tanınmış şairi Ramiz Rövşənin oğlu Ramiz Əliyev (Rövşənoğlu) barəsindədir. 

Qeyd edək ki, ədəbiyyatımıza öz möhürünü vurmuş şair Ramiz Rövşənin 3 ovladı var:
2 qız, 1 oğlan. Şair oğluna 1961-ci ildə rəhmətə getmiş qardaşının adını verib - Rövşən.

Rövşən Ramiz oğlu Əliyev 25 mart 1980-ci ildə Bakıda anadan olub. 226 saylı orta məktəbi bitirib. Bakı Dövlət Universitetinin jurnalistika fakültəsini 2000-ci ildə bakalavr, 2002-ci ildə isə magistr üzrə bitirib.

Universitetin bakalavir pilləsində təhsil aldığı müddətdə “525-ci qəzet”də işləyən Ramiz Əliyev mədəniyyətlə bağlı yazılar yazıb. Amma magistraturadan sonra fəaliyyətini jurnalistikaya deyil, elmlə məşğul olmağa yönəldib.
Bir çox publisistik yazıların, elmi məqalələrin müəllifi olan Rövşən Əliyev tərcüməçiliklə də məşğuldur. Bolqarıstanın eks-prezidenti Jelyu Jelevin “Faşizm” əsərini, dünya nəsrindən seçmələr toplusu olan “Yeddi məhbusun hekayəsi” kitabını Azərbaycan dilinə tərcümə edən şair oğlu bu və digər tərcümələrinə Rövşən Ramizoğlu imzası qoyub.

Rövşən Ramizoğlu ali təhsilini başa vurandan sonra Bakı Slavyan Universitetində (BSU) işə düzəlib. O, BSU-nun Jurnalistikanın nəzəriyyəsi və təcrübəsi kafedrasının baş müəllimi olub. 
Rövşən Ramizoğlu elmi dərəcəsini işlədiyi BSU-da alıb, filologiya üzrə fəlsəfə doktorudur.

2012-ci ildən Azərbaycanı tərk edərək Türkiyənin Konya şəhərinə köçən Rövşən Ramizoğlu hazırda qardaş ölkədəki Səlcuq Universitetində dərs deyir, 

O, 2013-cü ilin fevralında ailə həyatı qurub, Bakı Slavyan Universitetinin (BSU) laborantı Elnurə Verdiyeva ilə evlənib. Gənc ailənin hazırda Selcan adlı bir qızı var. Körpə 2013-cü il noyabrın 28-də dünyaya gəlib.

Rövşən Ramizoğlu həm də qlobal internet layihəsi olan Vikipedi-nın Azərbaycan dilindəki idarəçilərindən biridir.