Bakı Şopinq Festivalına İçərişəhərdə, Qoşa Qala qapısı qarşısında keçirilən şou-proqramla start verilib.
Xeberle.com APA-ya istinadən xəbər verir ki, İçərişəhər Dövlət Tarix-Memarlıq Qoruğu İdarəsinin yaxından dəstəyi ilə təşkil edilən proqramda bir sıra tanınmış incəsənət ustaları çıxış edəcəklər.
Açılışda iştirak edən Mədəniyyət və Turizm Nazirliyinin İnformasiya və ictimaiyyətlə əlaqələr şöbəsinin müdiri Vüqar Şixəmmədov bildirib ki, paytaxtda ilk dəfə keçirilən Bakı Şopinq Festivalı insanların alış-verişi üçün mühüm imkanlar yaradır.
Onun sözlərinə görə, artıq Bakıda fəaliyyət göstərən 110-a yaxın satış mağazası bu festivala qoşulub: "Festival çərçivəsində vətəndaşlar 50-yə yaxın mehmanxana və restoranın xidmətindən istifadə edə biləcəklər.
"Tax Free” sistemi istifadədir, əcnəbilərlə yanaşı, ölkə vətəndaşları da bu xidmətdən yararlana bilər. Bizim məlumatımıza görə, gün ərzində "Tax Free” xidmətindən istifadə olunub. Vergilər Nazirliyi tərəfindən 7 alış-veriş mərkəzində xüsusi köşk quraşdırılıb.
Vətəndaşlar ƏDV-ni əldə etmək üçün alış-veriş etdikdən sonra qəbzlərini köşklərdə təsdiq etdirməli, sonradan mərkəzi banklardan birinə yaxınlaşaraq ƏDV-ni geri almalıdırlar”.
V.Şıxəmmədov qeyd edib ki, İçərişəhərdə keçirilən tədbir festival çərçivəsində ilk mədəni tədbirdir: "Festivalın rəsmi açılış mərasimi bu gün saat 19:00-da Heydər Əliyev Sarayında baş tutacaq”.
Qeyd edək ki, bu gündən Azərbaycan paytaxtında ilk dəfə Ticarət festivalı - "Baku Shopping Festival” başlayıb. Festival mayın 10-dək davam edəcək.
İlk Bakı Şopinq Festivalındə Mədəniyyət və Turizm Nazirliyi ilə yanaşı, digər aidiyyəti qurumlar da iştirak edir. Bakı Şopinq Festivalı xaricdən turist axınını təşkil etmək, eyni zamanda, daxili turizmi inkişaf etdirmək məqsədi daşıyır.
Festival günlərində 100 manat və daha çox alış-veriş edən hər bir əcnəbi və ya Azərbaycan vətəndaşı bu sistemdən yararlana biləcək. Bakı Şopinq Festivalının internet saytı - www.bakushopfest.com Azərbaycan, ingilis, rus, ərəb dillərində fəaliyyət göstərir.
Xəbərdən istifadə edərkən istinad etmək vacibdir.
