Daxili işlər naziri, general-polkovnik Ramil Usubov əmr imzalayıb.
Daxili İşlər Nazirliyinin mətbuat xidmətindən Xeberle.com-a verilən məlumata görə, Faşizm üzərində Qələbənin 72-ci ildönümü münasibətilə 1941-1945-ci illər müharibəsinin iştirakçıları - istefada olan polis polkovnikləri İsmayıl Qasımovun və Yunis Məmmədovun, istefada olan polis polkovnik-leytenantı Mehdi Mehdiyevin, istefada olan polis mayoru Əli Hacıyevin "Azərbaycan Polisinin 95 illiyi (1918-2013)” Azərbaycan Respublikasının yubiley medalı ilə təltif olunmaları barədə müvafiq əmr imzalanıb.
Mayın 9-da DİN Şəxsi Heyətlə İş İdarəsinin rəisi, polis polkovniki Rahib Qarayev 92 yaşlı İsmayıl Qasımovun evində olub, nazirliyin rəhbərliyinin səmimi salamlarını və xoş arzularını ona çatdırıb, təltif olunduğu yubiley medalını veterana təqdim edib.
Görüşdə faşizm üzərində tarixi qələbənin qazanılmasında həmvətənlərimizin ön və arxa cəbhədəki böyük fədakarlığından və qəhrəmanlığından bəhs olunub, məhz ulu öndər Heydər Əliyevin ali hakimiyyətə qayıdışından sonra 9 mayın müstəqil Azərbaycanda dövlət səviyyəsində qeyd edildiyi, Prezident  İlham Əliyev tərəfindən cəmiyyətin ən dəyərli üzvləri kimi onlara hər cür diqqət və qayğı göstərildiyi vurğulanıb.

Xəbərdən istifadə edərkən istinad etmək vacibdir.