Ətrafımdakı bəzi insanları heç cür anlamıram. Belə çıxır ki, məni millətimizdən çox sevirlər. Ya da, əksinə, yalnız məni sevib millətə nifrət edirlər. İkincini daha çox qəbul edirəm.

Millətinə nifrət edib məni sevənlərin də sevgisinə inanmıram. Mən bir Türkəm və bunu hər yerdə şərəflə söyləyirəm. Bəziləri naxoş olacaq deyə ilk dəfə Türk olduğunu 15 yaşında öyrənən bir vətəndaş olaraq bu həsrətini çəkdiyim milli sevgimi içimdən çıxarda bilmərəm.

Düşünən beyni olan hər kəsə sirr deyil ki, Türk millətini yatırtmaq üçün bütün dünya birləşib. Türk yatarsa, dünyanı istədiyi kimi, idarə etmək istəyən qüvvələrin işi rahat olacaq.

Türkün oyanmaması üçün Avropanın, Vatikanın, ABŞ-ın, İranın, Səudiyyə Ərəbistanının birgə istehsal etdiyi "parçala, hökm sür!” dərmanları əsrlərdir dövriyyəyə buraxılıb.

Sağçı-solçu, mərkəzçi, dinçi, məzhəbçi, təriqatçı, camaatçı və s. dərmanlarla zəhərləyib yatırırlar. Nə xoşdur ki, millətimizin bəzi düşünən beyinlərinin susmaması nəticəsində çox az qisim bu bəladan qurtula bilib. Bunun da tək səbəbi Türk ziyalılarıdır. Mirzə Fətəli Axundovdan tutmuş Mirzə Ələkbər Sabir ta Mirzə Cəlilə qədər yüzlərlə ziyalılarımızın adını çəkərəm ki, bütün təzyiqlərə və çətinliklərə baxmayaraq xalqı tamamən zəhərləyib yatırtmamaları üçün həyatlarını təhlükəyə atıblar. Mən ziyalı bir nəslin davamçısıyam. Babamın bir sözü var idi. Millətləri yatmağa qoymayan onun ziyalılarıdır. Ziyalısı susan millət yox olmağa məhkumdur. Odur ki, mənim üçün narahat olan hər kəsə deyirəm ki, millətimin zəhərlənməməsi, yatmaması üçün ölümü gözə alanlardanam. Bizlər susaraq əmin olun millətimizi tamamən itirərik. Milləti yox olanların nə dövləti, nə vətəni olmaz. Sosial şəbəkələr biz Türklər üçün Tanrının bir lütfüdür. Niyə, - deyə soruşanlara söyləyim.

Türk millətinin oxuma, araşdırma marağı əsrlərdir ölüb. Məscidlərlə gətirilən bir adət, yəni ancaq dinləməklə öyrənən bir millət halına gətirildiyimizi etiraf etməliyik. Yalan-doğru nə desələr, mollalar, axundlar deyirsə, doğrudur, - deyib soruşmaq, araşdırmaq, zəhmətini çəkmək istəmirik. Məktəblərə, təhsilə marağı olmayan bir cəmiyyət halına gətirilmişik. Amma buna baxmayaraq özünü dərk edən hər Türkün istər yobaz olsun, istərsə də qeyri-yobazın facebook ünvanı var. Onlar qəbul etsə də, etməsə də, insanımızı oyandırmaq üçün bildiklərimizi facebookda yüksək səslə bildirməliyik. İlk olaraq onların bizə əsəbləşəcəyindən ya da söyüş söyməsindən qorxmamalıyıq. Mən 10 ildir onu edirəm.

Deyə bilərəm ki, 10 il əvvəl yazdığım, söylədiyim ətrafa dəhşətli görünürdü. Hətta məni hansısa ideologiyaya xidmət edən dinsiz, nə bilim ateist kimi qələmə verib, millətçi, faşist deyib sosial şəbəkələrdə ayrı-ayrı səhifələrdə şəkillərimi paylaşaraq ölümümə fərman verənlər də oldu. Həmin səhifələrə girib bu mövhumatçılara qarşı eyni fikirdə qaldığımı, öz millətimi sevməsəm, başqa millətlərə sayğılı olmamın səmimi olmadığını, hansısa dində qalacağamsa, o dinin kitabını öz dilimdə öyrənib, məni axundların yox, oxuduğum kitabların hara dəvət etdiyini, Tanrı ilə aramıza heç kimi soxmadan yaradanın mənə verdiyi dildə onunla dərdləşmək istədiyimi dəfələrlə söylədim. Axundun, mollanın vasitəsilə deyil, öz səyimlə bir iş görməkdən yana olduğumu vurğuladım.

Nə isə, qısası, bütün ziyalılarımıza üzümü tuturam. Normal və demokratik cəmiyyətdə yaşamaq istəyirsinizsə, öncə millətimizi ideoloji zəhərlənmədən qurtarın. Şərqin, Amerikanın, Vatikanın, İranın, Səudiyyə Ərəbistanın ölkəmizə ixrac etdiyi sağ, sol, din, məzhəb kimi şeylərdən millətimizi, dövlətimizi qoruyun. Məktəblərə gedib təhsil almalarını, heç olmasa, Türk millətinin keçmişi, inancları ilə bağlı araşdırmaları oxumalarına şərait yaradacaqsınız.

Yox! Mən bunu desəm, cəmiyyət məni əzər deyib, millətin zəhərlənməsinə göz yumacaqsınızsa, o zaman siz ziyalı deyil, nadansınız. Ziyalı Nəsimi kimi olar - dərisi soyulmağa gedərkən belə başını dik tutub susmayan...

Nigar Ögeday
Xeberle.com, İzmir