Azərbaycan Milli Kulinariya Mərkəzinin rəhbəri Tahir Əmiraslanov ölkədə fəaliyyət göstərən otellərin menyusu ilə bağlı narazılığını bildirib. Xeberle.com Modern.az-a istinadən xəbər verir ki, baş kulinar bu gün iştirakçısı olduğu tədbirdə qarşılaşdığı məqamla bağlı sosial şəbəkədə məlumat verib.
 "Bu gün "Holiday İnn” otelindəydik . Ölkəmiz üçün çox vacib və lazımlı bir beynəlxalq tədbirdə iştirak edirdim. Tədbirdə mili yeməklərimizin qorunmasından, patentləşməsindən, brendləşməsindən danışıb nahar üçün 18-ci mərtəbəyə qalxdıq.
Naharda bir adda belə Azərbaycan xörəyi qoyulmamışdı. (Heç Avropanın da yanından keçməmişdilər). Qonaqlar kinayə ilə "Bəs Azərbaycan xörəkləri?" -deyə üzümüzə baxdılar. Verilən yeməklərin keyfiyyətinin sıfırdan aşağı olması bir yana, biz milli mətbəximizi - dolmanı , lavaşı necə mühafizə edəcəyik? Yalnız bu oteldə deyil, aparıcı otellərin əksəriyyətində beynəlxalq tədbirlərdə qonaqlara Azərbaycan milli mətbəxindən yeməklər verilmir”.
 T.Əmiraslanov deyib ki, əsas gətirilən heç bir arqumenti qəbul etmir:
"Bütün arqumentləri, daha doğrusu bəhanələri bilirəm, amma heç birini qəbul etmirəm.
 Dolmanı, lavaşı, bozbaşı "təbliğ" edəndə erməni aparar da! Yeməyənin malını yeyərlər. Bu otelləri işlədənlər, orada işləyənlər Azərbaycana düşmənlik edirlər. Ordudakı bəzi satqınlar kimi, niyə çörəyimizi yeyib bizi bəyənmirlər? Nə vaxta qədər?
 Axı ölkə Dünya Turizm Təşkilatının tədqiqatlarına görə turistlərin yadında 82 faiz yalnız milli mətbəxinə görə qalır. İndi bu gələnlərin yadında nə qaldı.? Ölkəmiz millı mətbəxin qorunması, təbliğı üçün əlindən gələni edir.Otellər və telekanallar isə edilənləri var gücləri ilə sıfırlayırlar. Niyə?!”

Xəbərdən istifadə edərkən istinad etmək vacibdir.