“Azad İsgəndərov da səhv edir, o sözü deyən polis də!”. Bunu Modern.az saytına açıqlamasında Azərbaycan Vətən Müharibəsi Veteranları Birliyinin sədri Füzuli Rzaquliyev Qarabağ müharibəsi əlili, Laçının müdafiəsi uğrunda döyüşlərdə ağır xəsarət almış Niyaz Əmiraslanovun döyülməsi ilə bağlı hadisəyə münasibət bildirərkən deyib.   

Onun sözlərinə görə, Qarabağ qazisi Zaur Həsənovun ölümündən 1 ay keçməmiş daha bir qaziyə qarşı belə münasibətdən təəssüflənir. 

“Qarabağ qazisi qanunu pozsa belə, məhkəmə var, qayda-qanun var. Onlara kim ixtiyar verib ki, veterana, əlilə əl qaldırsın.Yenə deyirəm Qarabağ qazisinə hörmətsizlik edənlərin damarında erməni qanı var. Onları tapıb mətbuatda işıqlandırmaq lazımdır. Vətən yolunda canını qoymuş insanlara qarşı olan bu münasibəti hamı görsün. Maraqlıdır, bunlar niyə qudurub, axı nə istəyirlər?. 

“Qarabağ qaziləri" İctimai Birliyi”nin sədri Etimad Əsədov isə olayla bağlı deyib:
“Bu heç cür doğru olan bir şey deyil. Azərbaycan reallığı budur ki, vətən uğrunda xidmət göstərənlərə bu cür münasibət göstərilir. Azərbaycanımızın adına utanc verən bir hadisədir. Bütün bu proseslərin baş alıb getməsində, özbaşınalıqların, qazilərin, veteranların, şəhid ailələrinin təhqirlərə məruz qalmasının ən başlıca səbəbi, Azərbaycanda, xüsusilə Bakıda fəaliyyət göstərən 50-dən artıq QHT-nin günahıdır. Mühairbə əlilləri,veteranlar, şəhid ailələri, keçmiş hərbçilərin başında duran, başda mən Etmiad Əsədov olmaqla hamımızın günahıdır. Vahid mövqedən, bir araya gələrək veteranların, qazilərin, şəhid ailələrinin hüquqularını layiqincə müdafiə edə bilmirik”. 
Onun sözlərinə görə, buna etiraz etmək gərəkdir. 

Xatırladaq ki, yanvarın 17-də axşam saat 19.00 radələrində Qarabağ müharibəsi əlili, Laçının müdafiəsi uğrunda döyüşlərdə ağır xəsarət almış Niyaz Əmiraslanov hücuma məruz qalaraq, döyülüb. Bu barədə Qarabağ qazisi özü məlumat yayaraq bildirib ki, hücum zamanı onunla yanaşı, Böyük Vətən müharibəsi veteranı olan atası Vəli Əmiraslanova da xəsarət yetirilib. Niyaz Əmiraslanovun sözlərinə görə, onlara hücum edənlər Azad Isgəndərov adlı iş adamına yaxın şəxslər və “Riyad” Mühafizə Xidmətinin əməkdaşları olub. Səbəb isə budur ki, Azad Isgəndərovun rəhbərlik etdiyi tikinti Niyaz Əmiraslanovun evinə gedən yolu kəsir. Qarabağ qazisi deyir ki, o, yolunun kəsilməsinə etiraz etdiyinə görə hücuma məruz qalıb. Nicat Əmiraslanov baş verənlərlə əlaqədar Binəqədi rayonu, 4-cü polis bölməsinə şikayət edib. 

“Bölmədə təhqiqatçı Natiq Təhməzovun ”səni Qarabağa mən göndərmişdim? Ağlın olsaydı, getməzdin" deməyi mənə döyülməkdən də pis təsir elədi", - deyə Qarabağ əlili bildirib.