Sumqayıt şəhər Yaşıldərə yaşayış massivinin sakinləri 39 nömrəli marşrut avtobuslarının sayının azlığından və intervalının 45-50 dəqiqə olmasından şikayətlənirlər.

Xeberle.com olaraq məsələ ilə bağlı Sumqayıt şəhər Nəqliyyat Departamentinin rəisi Seyfulla Əsədullayev ilə əlaqə saxladıq. Onun sözlərinə görə, adıçəkilən məntəqədə yolların xarab olması həmin əraziyə marşrut avtobuslarının girişini əngəlləyir. Buna görə də bəzi marşrut avtobusları ləğv olunub, bəzilərində də gecikmə halları yaşanır. Yolların nə zaman düzəldiləcəyini soruşduqda isə bu barədə heç bir məlumatının olmadığını bildirdi. Sualımızı Sumqayıt şəhər İcra Hakimiyyətinin mətbuat xidmətinin rəhbəri Eyvaz Qocayevə yönləndirmək istəsək də, məzuniyyətdə olması ilə əlaqədar məsələ ilə bağlı heç bir məlumat verə bilməyəcəyini dedi. Məsələ ilə bağlı Mənzil Kommunal Təsərrüfatı İstehsalat Birliyinin rəisi Rahim Mustafayevlə də əlaqə saxlamağa çalışdıq. Lakin dəfələrlə zəng etsək də qurum rəhbəri telefonumuza cavab vermədi.

Yeri gəlmişkən, Sumqayıtda 34 saylı və 6 saylı marşrut avtobuslarının ləğvi ilə əlaqədar redaksiyamıza çoxsaylı şikayətlər daxil olub.

Görünən odur ki, vətəndaşların bu probleminin nə vaxt həll olunacağı bəlli deyil. Məsul şəxslərdə isə bu barədə dəqiq informasiya yoxdur.