Əhalinin şikayətlərinə operativ surətdə baxmaq və problemlərini həll etmək üçün əksər dövlət qurumlarında "Qaynar xətt" fəaliyyət göstərir. Məhz bu "xətlər” vasitəsilə vətəndaşlar istədikləri suallara telefondaca cavab alır, yaxud problemlərinin həll edilməsini bu xidmət vasitəsilə gerçəkləşdirir. Həmin qurumlar mütəmadi olaraq əlaqə telefonlarını vətəndaşların diqqətinə çatdırmalı və bildirməlidir ki, istənilən şəxs həmin xidmətə müraciət edərək problemlərinin həllinə nail ola bilər. Sumqayıt şəhər İcra Hakimiyyətinin də 164 nömrəli "Qaynar xətt”i var.

Xeberle.com olaraq bəzi suallarımıza cavab tapmaq üçün, Sumqayıt şəhər İcra Hakimiyyətinin sözçüsü Eyvaz Qocayev ilə əlaqə saxladıq. E.Qocayev suallarımızı cavablandırmaq əvəzinə bizə qaynar xətdən məlumat almağı tövsiyə etdi. Məlumat almaq üçün, 164-ə zəng etsək belə, nömrəyə zəng etməyin mümkün olmadığını gördük.

Əvəzində İnformasiya təminatı və təhsil sektorunun müdiri Ənvər Hüseynovla əlaqə saxladıq. O, zəngimizə cavab verib qeyd etdi ki, "Narmobile" və "Bakcell" abunəçilərindən 164-ə zəng etmək müvəqqəti olaraq dayandırılıb. Hal-hazırda 164-ə zəng edib, problemlərimizi bildirmək üçün "Azercell" abunəçisi olmalıyıq.

Biz də "Azercell" nömrəsi ilə "Qaynar xətt"ə zəng vurduq. İnsafən deyək ki, zəngimizə tez cavab verdilər. Və oradan bildirdilər ki, suallarımıza İcra hakimiyyətinin mətbuatla əlaqədar şəxsi olan Eyvaz Qocayev cavablandıra bilər.

Maraqlıdır ki, 164 "qaynar xətti"nə məsul şəxslə mətbuatla işləməli olan şəxs bizimlə niyə ötür-ötürdü oyunu oynayır?!

Hicranə İsmayılova

Xeberle.com