"Sumqayıtda 43-cü məhəllədə məcburi köçkünlərin məskunlaşdığı yataqxanada baş vermiş yanğın zamanı əhaliyə dəymiş ziyanla bağlı araşdırma aparılır və kompensasiya ödəniləcək.

”Xeberle.com-un məlumatına görə bu sözləri sözügedən yataqxanada məskunlaşan qaçqın və məcburi köçkünlərlə görüşü zamanı Sumqayıt şəhər İcra hakimiyyətinin başçısı Zakir Fərəcov deyib. Z. Fərəcov qeyd edib ki, yaxın 10 gün müddətində yanan evlər əsaslı təmir ediləcək və sakinlərin yenidən orada məskunlaşması təmin ediləcək. İcra Başçısı həmin binada məskunlaşan sakinlərə şad xəbər də verib. O, bildirib ki. sözügedən yataqxanada yaşayan məcburi köçkünlər Sumqayıtın 12-ci mikrorayonunda inşa olunan qaçqınlar şəhərciyində yeni mənzillərə köçürüləcək: "Belə qərara alınıb ki, bu yataqxanada məskunlaşan həmvətənlərimiz Sumqayıtda inşa olunan və dekabrda istifadəyə veriləcək qaçqınlar şəhərciyinə köçürülsün. İlkin mərhələdə bu il və gələn il ərzində Sumqayıtda məskunlaşan 5000 məcburi köçkünün yeni mənzillərlə təmin olunması nəzərdə tutulur. "

Qeyd edək ki, ərazidə evləri yanan sakinlərin müvəqqəti məskunlaşması üçün FHN ərəfindən 22 çadır quraşdırılıb və bu çadırlarda 88 sakin yerləşdiriləcək.

Xatırladaq ki, sözügedən yataqxanada 114 ailə məskunlaşıb.