Xəbər verdiyimiz kimi, avqustun 26-da Qəbələ şəhərində V Beynəlxalq Mürəbbə Festivalı keçirilib. Tədbirdə 22 ölkənin şirniyyatçıları, eləcə də Azərbaycanın 44 şəhər və rayonunu təmsil edən mürəbbə ustaları öz məhsullarını nümayiş etdiriblər. Münsiflərin rəyi əsasında iştirakçıların gözü qarşısında ən yaxşı mürəbbə hazırlayan şəxslər müəyyən edilib. Mürəbbə müsabiqəsində 3 nominasiya üzrə qaliblər elan olunub.

Qubadlı rayonunun da bir çox mürəbbə növləri ilə qatıldığı festivalda rayon "Cənnət alması" mürəbbəsinə görə 1-ci yerə layiq görülüb. Fərqlənənlər kubok, medal və qiymətli hədiyyələrlə mükafatlandırılıb. Xatırladaq ki, yarışlar bitdikdən sonra mürəbbələrin satışı üçün şərait yaradılıb və sərgi təşkil olunub. Festival çərçivəsində xalq tətbiqi sənəti ustalarının əsərlərindən ibarət sərgi-yarmarkalar, həmçinin, Qəbələnin bədii kollektivlərinin çıxışları da təşkil edilib. Festival maraqlı konsert proqramı ilə davam etdirilib.