Sumqayıta gələn və Abşeron rayon Üzümlük yaşayış massivindən keçən 400 mm diametrlik su borusu partlayıb.

Xeberle.com-un verdiyi məlumata görə hadisə gecə saat 1 radələrində baş verib. Borunun partlaması nəticəsində ərazidən keçən Abşeron magistral kanalında beton plitələrin bəzi hissələri çöküb və 150 metr məsafədə sürüşmə baş verib. Həmçinin Abşeron rayon Üzümlük massivində yaşayan əhaliyə də ziyan dəyib: su evlərin içinə daxil olub, 6 ev su altında qalıb. Hadisəyə vətəndaşların öz təşəbbüsləri ilə yolu təmir etmək istəyərkən betonun borunun üzərinə tökülməsi səbəb olub. Sumqayıt şəhər Su Kanal İdarəsinin rəis müavini Qurban Mikayılov bildirib ki, hazırda həmin ərazidə idarə tərəfindən təmir işləri aparılır. Onun sözlərinə görə, hadisə nəticəsində boru xəttinə azı 15 min manat ziyan dəyib. O, ərazidə təmir işləri bitdikdən sonra əhalinin su ilə təmin olunacağını vurğulayıb. Qeyd edək ki, boru xəttinin partlaması nəticəsində 16, 18 və 21-ci mikrorayonlar, 17-ci mikrorayonun bir hissəsi, 48-ci məhəllə, Corat qəsəbəsinin yarısı, Yaşıldarə yaşayış massivinin bir hissəsində yaşayan əhali susuz qalıb.