2013-cü ilin nəticələrinə görə istehsal olunaraq sifarişçilərə təhvil verilmiş müdafiə təyinatlı məmulatların həcmi artıb.

Virtualaz.org-un yerli KİV-ə istinadən məlumatına görə, bunu Azərbaycanın müdafiə sənayesi naziri Yavər Camalov deyib.

“Nazirliyin müəssisələrində yaradılan, istehsal olunan müdafiə təyinatlı məmulatlar 2009-cu ildən başlayaraq beynəlxalq müdafiə sənayesi sərgilərində nümayiş etdirilir və böyük maraqla qarşılanır”, - deyə nazir bildirib.

Yavər Camalov qeyd edib ki, ötən ilin may ayında Türkiyədə keçirilən “IDEF-2013” XI beynəlxalq müdafiə sənayesi sərgisində 130 adda müdafiə təyinatlı məmulat nümayiş etdirilib.

Onun sözlərinə görə, MSN bu sərgidə müxtəlif növ atıcı və yaxın məsafəli döyüş vasitələri, döyüş sursatları, optik nişangahlar, mühəndis texnikası və s. məmulatlarla yanaşı, ilk dəfə olaraq “Yalquzaq” snayper tüfəngi, HP-7,62 tipli hücum pulemyotu, “Gürzə” xüsusi təyinatlılar üçün patrul maşını, pilotsuz uçuş aparatları və digər məmulatları da nümayiş etdirib: “Dünyanın 36 ölkəsindən 500-dən çox şirkətin qatıldığı sərgidə Azərbaycan istehsalı olan məmulatlar, xüsusilə “Yalquzaq”,  “İstiqlal”, “Mübariz”  snayper tüfəngləri, hücum pulemyotu, “Gürzə” xüsusi təyinatlılar üçün patrul maşını, müxtəlif növ döyüş sursatları böyük maraqla qarşılandı”.

Nəticədə Müdafiə Sənayesi Nazirliyi ilə əməkdaşlıq еtmək istəyən ölkələrin və şirkətlərin sayı artmaqda davam edir.

Yeri gəlmişkən, Azərbaycan ilk dəfə olaraq 2014-cü ilin sentyabrında beynəlxalq  müdafiə sənayesi sərgisinə ev sahibliyi edəcək.

“ADEX-2014”  adı altında keçiriləcək sərgi ilə bağlı Müdafiə Sənayesi Nazirliyi tərəfindən artıq hazırlıq işlərinə başlanılıb. Sərginin yüksək səviyyədə keçirilməsi üçün təşkilati tədbirlər görülür.