Ötən gün bəzi informasiya saytlarında daha bir məmurun İraq Kürdüstanında keçirilmiş "müstəqillik referendumu”na açıq dəstək nümayiş etdirməsi ilə bağlı xəbər yayılıb. Qeyd edilib ki, Vüqar Bəndalıoğlu adlı həmin məmur "Azəravtoyol" İstehsalat Təmir-Tikinti Birliyinin 2 saylı şöbəsində çalışıb.
Qurumun mətbuat xidmətinin rəhbəri Anar Nəcəfli Modern.az-a deyib ki, bu cür məlumatın yayılmasına baxmayaraq onu tirajlayan heç bir media qurumu "Azəravtoyol” ASC ilə məlumatın doğru olub-olmadığını dəqiqləşdirməyib:
"Halbuki bununla da həm o məlumatı yazan jurnalist, həm də onu yayan media qurumu birbaşa olaraq "Kütləvi İnformasiya Vasitələri haqqında” Qanunu, Jurnalistin Peşə Etikası Kodeksini və Jurnalistlərin Peşə Davranışı Qaydalarını kobud şəkildə pozub.
Rəsmi olaraq bildirmək istəyirik ki, yayılan məlumatar həqiqəti əks etdirmir, "Azəravtoyol” ASC-nin İstehsalat Təmir-Tikinti Birliyi adında müəssisəsi və Vüqar Bəndalı oğlu adlı əməkdaşı yoxdur.
Bundan sonra "Azəravtoyol” ASC ilə bağlı olan hər hansı bir məlumatı yayımlamazdan öncə bizimlə dəqiqləşdirib və yalnız rəsmi mövqeyimiz olduqdan yayımlamaq məsləhətdir.
Əks halda qanunvericiliyə uyğun olaraq addımlar atılacaq”.
Xəbərdən istifadə edərkən istinad etmək vacibdir.
