"Əlilliyi olan Şəxslərin Sosial Müdafiəsinə və İnteqrasiyasına Dəstək" İctimai Birliyi (ƏSMİD) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə "Əhalinin həssas qruplarına psixoloji dəstək və əlilliyi olan şəxslər üçün ölkəmizin milli, mədəni, tarixi abidələrinə səyahət turlarının təşkili" layihəsinin icrasını başa vurub. Oktyabrın 2-də layihə çərçivəsində Quba rayonuna ekskursiya həyata keçirilib. Tədbiri giriş sözü ilə açan layihə rəhbəri Səbinə Kərimova iştirakçıları salamlayaraq, layihənin məqsədindən danışıb. Layihənin məqsədi fiziki məhdudiyyəti olan şəxslərə psixoloji dəstək olaraq, onların cəmiyyətə inteqrasiya olunmasında yardımçı olmaq, cəmiyyətin bu məsələyə diqqətini çəkmək, sosial aktiv vətəndaşları bu yöndə fəaliyyətə cəlb etməkdir. Layihə çərçivəsində Şəki, İsmayıllı, Sumqayıt və sonuncu nəzərdə tutulan Quba turu ilə ekskursiyaların yekunlaşdığını bildirib. Quba Soyqırımı Memorial Kompleksinin direktoru Səidə Abbasova əlilliyi olan şəxslərə can sağlığı arzulayıb və dövlətimizin xüsusi qayğıya ehtiyacı olan şəxslərə göstərdiyi diqqətdən söz açıb. Sonra Soyqırım abidəsi barədə geniş məlumat verib. Quba Soyqırım Memorial Kompleksindən əlavə bir çox tarixi abidələrə gəzinti təşkil olunub.