Havaların bir müddət kəskin keçməsi, yağışların yağması Sumqayıtda olan bəzi yolların işlək vəziyyətdə olmadığını göstərdi. Bundan sonra isə saytımızın müxtəlif internet hesablarına şikayətlər gəlməyə başladı.
Müraciət edən şəxs Xeberle.com-a açıqlamasında qeyd edib ki, 12-ci mikrorayonun məhəllə daxili yolları bərbad vəziyyətdədir. Yağış yağanda gölməçələr yaranır, binaların ətrafı palçıq olur və yoldan keçmək mümkünsüz hala çevrilir.
Şikayətçi həm də əlavə etdi ki, əhali tərəfindən yollara daş, kəsək tökülüb ki, bu yollardan istifadə mümkün olsun. Ancaq, onlar da yola çarə ola bilməyib.
Məsələ ilə bağlı Sumqayıt şəhər İcra Hakimiyyətindən açıqlama almağa çalışsaq da telefonlarımıza cavab verən olmadı.
Qeyd edək ki, son vaxlar Sumqayıtın bir çox küçəsində yolların asfaltlanması işinə başlanılıb. Ümid edirik ki, tezliklə növbə 12-ci mikrorayonun daxili yollarına da gəlib çatacaq.
Sözügedən mikrorayonun küçələrindən olan şəkilləri sizə təqdim edirik:
 
Hicranə İsmayılova

Xəbərdən istifadə edərkən istinad etmək vacibdir.