Bu sözlər Sumqayıt şəhəri Hacı Zeynalabdin qəsəbəsinin Şirvan yaşayış massivində yaşayan Natiq Əliyevin Xeberle.com-a ünvanladığı şikayət məktubunda yer alıb.

N. Əliyev bildirib ki, belə hal yaşayış massivi ərazisində mövcud olan əksər evlərdə yaşanıb və nəticədə vətəndaşlara xeyli ziyan dəyib: "Bunlardan biri də mənəm. Evdə soyuducu, komputer və televiziya aparatı yanıb. Hadisə ilə bağlı getdik İşıq idarəsinə dedilər ki, biz heç nə ödəmirik. Şikayətiniz varsa gedib yuxarı orqanlara müraciət edin. Bilmək istəyirəm ki, görüm mənə dəyən ziyanı kimdənsə tələb etməyə haqqım varmı?”.

Bizə dəymiş ziyanı özümüz ya "Azərişıq" SəhmdarCəmiyyəti ödəməlidir?Hansı hallarda bu ödəmələr baş tutur? Bəs hüquqi tərəf nədeyir?

Rəsmi qurum nə deyir?

Məsələ ilə bağlı "Azərişıq” ASC-nin Şimal regional təchizatı və satışı idarəsinin paylayıcı şəbəkə sahəsinin baş mühəndisi Arzuman İsmayılovla əlaqə saxladıq. A. İsmayılov Xeberle.com-a açıqlamasında bildirdi ki, bu cür hallarda vətəndaşlar rəsmi müraciət etməlidirlər: "Birinci hər bir evin özünün avtomatı olmalıdır. Əgər evdə qısaqapanma və ya nasazlıq varsa, o zaman avtomat atmalıdır ki, avadanlıqlar yanmasın. Gərginliyin sürətlə verilməsinə gəldikdə isə, ola bilər ki, mənzilə gələn xətt qırılıb və ya xətdə nasazlıq olub. Belə hal yaşanarsa vətəndaşlar bizim baş idarəyə rəsmi müraciət etməlidirlər. Baş idarənin hüqüqşünası var ki, bu məsələni onlar aydınlaşdırırlar və rəsmi cavab yazırlar. Bir şəbəkə olaraq bu cür məsələlərə hüqüqşünas və komissiyanın iştirakı ilə yerində araşdıraraq, cavab veririk. Dediyiniz hal ilə bağlı isə yəgin ki, rəsmi müraciət olmayıb. Çünki, bizdə belə bir məlumat yoxdur."

Görəsən belə hallar olanda vətəndaşlar nə etməlidirlər?

Hüqüqşünas Ramil Süleymanlı Xeberle.com-a açıqlamasında bu kimi hallarla bağlı vətəndaşın atmalı olacağı addımları belə izah edib. Bildirib ki, belə hal həqiqətən yaşanarsa vətəndaşlara Azərişıq Səhmdar Cəmiyyəti tərəfindən ziyan ödənilməlidir: "Bu halda vətəndaşlara dəyən ziyanı tələb etməyə tam haqları var. Deməli, bununla bağlı müqavilə öhdəlikləri üzrə tərəflər bir-birlərinə vurduğu zərərlərə görə məsuliyyət daşıyırlar. Buna da, mülki və maddi məsuliyyət deyirlər. Bu o deməkdir ki, müqavilə öhdəliklərini yerinə yetirən, Azərişıq Açıq Səhmdar Cəmiyyətinin yerli şöbəsi göstərdiyi xidmət nəticəsində məhsulu istehlakçılara ötürür. Bu istehlakçılara tənzimlənməmiş formada ötürülməsi ilə bağlı bir vətəndaşa deyil də, həmin ərazidə yaşayan 5-6 bəzən 10 ailəyə eyni vaxtda zərər dəyirsə, bununla bağlı həmin ailələr ilk olaraq, Azərişıq Səhmdar Cəmiyyətinə müraciət etməlidirlər və qısa zaman ərzində şikayətlərinə baxılmalıdır. Şikayət araşdırıldıqdan sonra, həqiqətən əgər ziyan dəyibsə, ödənilməlidir. Yox, əgər Azərişıq Səhmdar Cəmiyyəti bunu qəbul etmirsə və deyirsə ki, bu birbaşa vətəndaşların məsuliyyətsizliyinə görə baş verib. Bu zaman məsələnin həlli yolunu məhkəmə təşkil etməlidir. Vətəndaşlar birbaşa məhkəməyə müraciət edə bilərlər, məhkəmə məsələni araşdırdıqdan sonra isə əgər ortada dəyən ziyan Azərişığa məxsusdursa, o zaman vətəndaşa dəymiş zərər Azərişıq Səhmdar Cəmiyyəti tərəfindən ödəniləcək”.

Hicranə İsmayılova

Xeberle.com