"Sumqayıtda son 2 il ərzində bir sıra layihə həyata keçirilib və hazırda da bu istiqamətdə işlər davam etdirilir. Şəhərin siması dəyişib, sakinlərin rifah halının yaxşılaşdırılması istiqamətində də tədbirlər həyata keçirilir. Ötən müddət ərzində Sumqayıta gələn əcnəbilərin sayında da artım müşahidə olunur. Bu bir daha göstərir ki, Sumqayıt gözəlləşir, inkişaf edir və xarici qonaqlar üçün cəlbedici bir şəhərə çevrilib."
Xeberle.com-un məlumatına görə, bu sözləri Sumqayıt şəhər İcra hakimiyyəti başçısının birinci müavini Faiq Kərimov Dövlət Miqrasiya Xidmətinin "Açıq qapı” vətəndaş forumunda çıxışı zamanı deyib.
F.Kərimov habelə şəhərdə təhsil müəssisələrinin vəziyyətindən də söhbət açıb. Birinci müavin qeyd edib ki, məktəblərdə, xüsusilə də bağçalarda yüksək səviyyədə təmir işləri aparılıb, dam örtükləri yenilənib və tərbiyə müəssisələri istiliklə təchiz edilib. O, 2 il bundan qabakı vəziyyəti isə belə xarakterizə edib: "İki il bundan öncə bağça müdirləri uşaqları qəbul edərkən valideynlərə deyirdilər ki, özünüzlə tas və qızdırıcı soba gətirin. İndi isə bağçalar bütün infrastrukturla təchiz edilib. Uşaqların təlim-tərbiyəsi üçün bütün şərait yaradılıb."
Hicranə İsmayılova
Xeberle.com
Xəbərdən istifadə edərkən istinad etmək vacibdir.
