Ətraf mühitin qorunması, təbiətdə ekoloji tarazlığın təmin olunması baxımından istehsalat və məişət tullantılarının küçələrdə, yaşayış binalarının ətrafındakı zibil qutularına atılması əsas şərtlərdən biridir. Yaşayış binalarının ətrafında qoyulan dəmir qablardan tullantılar təmizlik departamentinin nümayəndələri tərəfindən evakuasiya olunur, bunun müqabilində isə həmin binalarda yaşayan sakinlər müəyyən miqdarda ödəniş etməli olurlar.

Xeberle.com olaraq sakinlərin ödəməli olduğu həmin məbləği araşdırmaq üçün Sumqayıt şəhər Təmizlik Departamentinin direktoru Məhəmməd Məmmədov ilə əlaqə saxladıq. M. Məmmədov bildirdi ki, istehsalat və məişət tullantıları ilə bağlı xüsusi bir məbləğ müəyyən olunmayıb: "Tullantılarla bağlı ödəniş əsasən həmin ərazidə yaşayan insanların maddi vəziyyətindən asılıdır. Belə ki, bunun üçün bəzi ərazilərdə 1 AZN, bəzilərində 2, bəzilərində isə 3 AZN ödəniş edilir. Elə ərazilər də var ki, orada yaşayan sakinlər ödəniş etməsə də, biz oradakı tullantıları təmizləyirik”.

Qeyd edək ki, "İstehsalat və məişət tullantıları haqqında” Azərbaycan Respublikasının qanununda da tullantılar üçün xüsusi bir ödəniş müəyyən olunmayıb. Bununla yanaşı, Tarif (qiymət) Şurasının (TŞ) müəyyən etdiyi qiymət var. Şura nəzərdə tutur ki, hər bir vətəndaş il ərzində 1,53 kub/metr tullantı yaradır. Şuranın qərarına əsasən hər bir vətəndaş ayda 0.30 manat olmaqla, ildə 3,6 manat tullantının yığışdırılıb zərərsizləşdirilməsi üçün haqq ödəməlidir. Yəni, əgər ailə 5 nəfərdən ibarətdirsə 5x3,6 AZN =18 AZN tullantının zərərsizləşdiriməsi üçün müvafiq qurumlara ödəniş edilməlidir. Hüquqi şəxslərdə isə bu məbləğ müqavilə əsasında müəyyən olunur.