İlk öncə Azərbaycan Respublikasının Dövlət Himni səsləndirilib.

Çempionatda çıxış edənlər Baş İdarənin Gənclərlə iş sektorunun müdiri Ceyhun Hüseynov, Təhsil Şöbəsinin Metodiki Kabinetinin müdiri Gülbahar Haqverdiyeva iştirakçıları salamlayaraq, əsası Ümummili Lider Heydər Əliyev tərəfindən qoyulmuş dövlət gənclər siyasətindən, ölkə və şəhər rəhbərliyinin gənc nəslə göstərdiyi diqqət və qayğıdan, Respublikada dövlət gənclər siyasətinin uğurlu inkişafından danışıblar.

Qeyd olunub ki, məqsəd "Azərbaycan gəncliyi 2017 – 2021-ci illərdə” Dövlət Proqramından irəli gələn vəzifələri icra etmək, gənclərin intellektual səviyyəsini, dünyagörüşünü genişləndirmək, zehni inkişafını stimullaşdırmaq, onlar arasında elmin nüfuzunu artırmaq, asudə vaxtlarının səmərəli təşkil etməkdir. Bildirilib ki, şəhərimizdə də gənclərimizin hərtərəfli inkişafı üçün əlverişli şərait yaradılıb, müasir tələblərə cavab verən obyektlər istifadəyə verilib.

Turnirdə şəhərin müxtəlif sahələrini təmsil edən 14-17 yaş arası yeniyetmələrdən ibarət 14 komanda olmaqla, ümumilikdə 84 iştirakçı bilik və bacarıqlarının sınayıblar. Gərgin və maraqlı şəraitdə keçən bilik yarışının sonunda I yerə Texniki və Təbiət Elmləri Liseyinin "Ekskalibur” komandası, II yerə Təbiət Elmləri Təmayüllü Gimnaziyanın "Mayn Kampf” komandası, III yerə Texniki Təbiət Elmləri Liseyinin "Queensland” komandası layiq görülüb.

Qaliblərə Baş İdarənin kubok, medal, fəxri fərman və xatirə hədiyyələri təqdim edilib, fasilə zamanı isə nahar süfrəsi təşkil edilib.

Qeyd edək ki, qalib komandalar Çempionatın "Abşeron zonası” üzrə seçim turunda şəhərimizi təmsil etmək hüququ qazanıblar.