Sumqayıt Şəhər Məhkəməsində 3 yaşlı Arzu Qurbanlının ölümündə təqsirləndirilən "Real" Tibb Mərkəzinin həkim-anestezioloqu İsmayıl Qəmbərovun cinayət işi üzrə məhkəmə prosesi davam etdirilib.
Xeberle.com-un apa-ya istinadən xəbərinə görə, hakim Ruqiyyə Əsgərovanın sədrliyi ilə keçirilən prosesdə zərərçəkmiş şəxsin vəkili hakimə etirazla bağlı şikayət ərizəsi təqdim edib.
Zərərçəkmiş tərəf iddia edir ki, təqsirləndirilən şəxsin əlavə şahidlərin dindirilməsi ilə bağlı vəsatətini hakim təmin etməməli idi.
İddiaya görə, hakim cinayət işini qeyri-obyektiv araşdırdığı üçün əlavə şahid qismində Səhiyyə Nazirliyinin baş anestizioloq-reanimatoloqu Aydın Qədirovu məhkəməyə dəvət edib.
Təqsirləndirilən İ. Qəmbərov isə A. Qədirovun dindirilməsini yalnız işin düzgün araşdırılması baxımından önəmli hesab etdiyini qeyd edib.
Hakim etiraz məktubuna məhkəmənin sədri tərəfindən qiymət veriləcəyini bildirib.
Buna görə məhkəmə prosesi noyabrın 8-dək təxirə salınıb.
Qeyd edək ki, Sumqayıt şəhər sakini, 2014-cü il təvəllüdlü Qurbanlı Arzu Sənan qızı 2016-cı il iyunun 16-da günorta saatlarında Sumqayıt şəhərindəki "Real" Tibb Mərkəzində boğazında damaq badamcıqlarının iltihabından əməliyyat olunub. Həmin gün gecə saatlarında uşağın vəziyyəti pisləşib və o, dünyasını dəyişib. Meyit ekspertizaya göndəriləndən sonra uşağın boğulma nəticəsində dünyasını dəyişdiyi müəyyən edilib.
Faktla bağlı Sumqayıt şəhər Prokurorluğunda Cinayət Məcəlləsinin 124-cü (ehtiyatsızlıqdan adam öldürmə) və 320.1-ci (Rəsmi sənədləri, dövlət təltiflərini, möhürləri, ştampları, blankları saxtalaşdırma, qanunsuz hazırlama, satma və ya saxta sənədlərdən istifadə etmə - hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və ya qanunsuz hazırlama, yaxud bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) maddələri ilə cinayət işi başlanılıb və "Real" Tibb Mərkəzinin həkim-anestezioloqu İ.Qəmbərov təqsirləndirilən şəxs qismində cəlb edilib.
İ.Qəmbərov barəsində həbs qətimkan tədbiri seçilməyib.
Xəbərdən istifadə edərkən istinad etmək vacibdir.
