Bəzi nəqliyyat vasitələrinin tüninq edilməsində məqsəd eksklüziv avtomobilə sahib olmaqdır. Belə həvəskarlardan biri də Emil Maqalovdur. Bu vaxta qədər 25 avtomobil dəyişən sürücü deyir ki, onların hamısını tüninq edib.

Həmsöhbətim deyir ki, Avropa avtomobillərindən fərqli olaraq Rusiya istehsalı maşınların tüninq edilməsi çox vaxt problemlər yaradır. Avtomobil ehtiyat hissələrinin satışı ilə məşğul olanlar deyir ki, son vaxtlar gənclər arasında tüninq həvəskarlarının sayı artıb. Dəyişiklik əsasən də nəqliyyat vasitələrinin xarici görünüşündə edilir. Səkkiz ildir tüninq işləri ilə məşğul olan usta İlkin Quliyev deyir ki, avtomobildə mühərrikdən tutmuş buferə qədər dəyişiklik edilə bilər.

İndiyədək 400-ə yaxın maşını tüninq edən usta dəyişikliyi standartlara əsasən həyata keçirdiyini iddia edir. Avtomobilin rəngi, güzgüləri, qabaq və arxa buferləri, işıq cihazları dəyişdirilir. Hətta bəzən sayrışan işıqlar qoyulur, yaxud maşını hündürləşdirən və aşağı salan qurğular yerləşdirilir. Ekspert deyir ki, tüninq zamanı müəyyən standartlara əməl edilməlidir. Yalnız bu halda avtomobilin fərqli formalı detalını quraşdırmağa icazə verilir. Tüninq zamanı avtomobilin marka və modelinin dəyişdirilməsinə icazə verilmir. Qaydaları pozanları inzibati cəza tədbirləri gözləyir.Avtomobillərin tüninq edilməsi zamanı nəzərdə tutulan standartlar maksimum təhlükəsizliyə hesablanıb. Odur ki, tüninq həvəskarları texniki şərtlərə və qaydalara əməl etməklə avtoqəzaların sayını azalda bilərlər.