Xəbər verdiyimiz kimi, bir müddət əvvəl Abşeron rayonunun Saray qəsəbəsindən Sumqayıta və əks istiqamətdə hərəkət edən 522 saylı marşrut fəaliyyətini dayandırıb.
Marşrut xəttinin fəaliyyətini dayandırması Saray qəsəbəsində yaşayan bir qrup sakinin narahatçılığına səbəb olub. Onların sözlərinə görə, bu səbəbdən orada yaşayan insanlar palçıqlı yollarla uzun məsafə qət etmək məcburiyyətində qalıblar və dəfələrlə aidiyyəti orqanlara müraciət etmələrinə baxmayaraq, heç bir nəticə əldə edə bilməyiblər.
Bu fikirlər bir qrup sakinin Xeberle.com-a ünvanladığı şikayət məktubunda yer alıb.
Sakinlər problemlə bağlı Saray bələdiyyəsinə də müraciət ediblər.
Saray Bələdiyyəsinin sədr müavini Şahlar Məhərrəmov Xeberle.com-a bildirdi ki, hazırda bu iş üzrə məsuliyyətli şəxslərlə bərabər yolların marşrut avtobusları üçün əlverişli olub-olmadığı nəzərdən keçirilir: "Köhnə marşrut avtobuslarının xəttə buraxılmasına icazə yoxdur. Yeniləri üçün isə hazırda tərəfimizdən yollardakı şərait nəzərdən keçirilir. Çünki buradakı yollar torpaqdandır. Buna görə də, yalnız yolların yeni avtobuslar üçün əlverişli olub-olmadığı yoxlanıldıqdan sonra həmin marşrut avtobusları xəttə buraxıla bilər”.
Xatırladaq ki, bir müddət əvvəl "Sumqayıt Nəqliyyat" MMC-dən 522 saylı maşrut xəttinin bağlanmasının avtobusların kiçik həcmli olması və standartlara cavab verməməsi ilə əlaqədar olduğu bildirilmişdi.
O da qeyd olunmuşdu ki, həmin xətt iritutumlu avtobuslarla təmin ediləcək və yaranan problem aradan qaldırılacaq.
Elnarə Salamova
Xeberle.com
Xəbərdən istifadə edərkən istinad etmək vacibdir.
