Bəzi KİV vasitələrində "Qoca” ləqəbli kriminal avtoritet Etibar Məmmədovun yaxalanması zamanı xüsusi sücaət göstərmiş bir neçə polis əməkdaşının mükafatlandırılması ilə bağlı yayılan məlumatlar əsassızdır, həqiqəti əks etdirmir.
Bu sözləri Daxili İşlər Nazirliyinin mətbuat xidmətinin rəis müavini Orxan Mansurzadə Axar.az-ın sorğusuna cavab olaraq bildirib.
O.Mansurzadənin sözlərinə görə, E.Məmmədovun yaxalanması zamanı fərqlənən polis əməkdaşlarından ikisinin rütbəsinin qaldırılması və digərinin isə Polis Akademiyasında təhsil almağa göndərilməsi ilə bağlı yazılanlar yanlışdır, həqiqətə uyğun deyil:
"Bu məlumatlar kökündən yanlışdır. Dünyanın hər yerində olduğu kimi, cinayətkarlıqla mübarizə, ictimai asayişin təmini, əmin-amanlığın və sabitliyin qorunması daxili işlər orqanlarının üzərinə düşən əsas vəzifələrdəndir. Ölkəmizin daxili işlər orqanlarının əməkdaşları da bu kontekstdə üzərlərinə düşən vəzifələri layiqincə yerinə yetirirlər”.
Qeyd edək ki, Üçnöqtə.az-ın xəbərinə görə, "Qoca” ləqəbli kriminal avtoritet Etibar Məmmədovun yaxalanması zamanı fərqlənən polis əməkdaşlarından ikisinin rütbəsi qaldırılıb, digərini isə müvafiq zamanda Polis Akademiyasında təhsil almağa göndərilib. Əməliyyatda iştirak edən polis nəfərləri pul mükafatları və digər qiymətli əşyalarla mükafatlandırılıb.

Xəbərdən istifadə edərkən istinad etmək vacibdir.