Qarabağ Azadlıq Təşkilatının (QAT) üzvləri I Fəxri Xiyabanda Qarakənd faciəsinin 26-cı ildönümü münasibətilə hadisə qurbanlarının məzarını ziyarət ediblər.
Bu barədə QAT sədri Akif Nağı məlumat verib.
O bildirib ki, erməni terrorçuları tərəfindən törədilən bu faciə Dağlıq Qarabağ münaqişəsinin dinc yollarla həllinə açılan atəşdir:
"20 noyabr erməni terroru qurbanlarının məzarlarını ziyarət etdik. 1991-ci il noyabrın 20-də Qarakənd səmasında Azərbaycanın dövlət xadimlərinin, mətbuat nümayəndələrinin, Rusiya və Qazaxıstandan olan vasitəçilərin olduğu helikopter erməni terrorçuları tərəfindən vurulub və nəticədə helikopterdəki 22 nəfərin hamısı həlak olub. Allah bu terror aktı nəticəsində həlak olanlara, bütün şəhidlərimizə rəhmət eləsin”.
Qeyd edək ki, 1991-ci il noyabrın 20-də Xocavənd rayonunun Qarakənd kəndi üzərində göyərtəsində Azərbaycanın rəsmi şəxslərinin olduğu Mi-8 helikopterinin erməni silahlı dəstələri tərəfindən vurulması nəticəsində helikopterdə olan 22 nəfər həlak olub. Əvvəlcə rəsmi olaraq helikopterin dumana düşərək qayaya çırpılması ehtimalı irəli sürülsə də, bir neçə gündən sonra onun vurulması faktı təsdiqlənib.(Axar.az)

Xəbərdən istifadə edərkən istinad etmək vacibdir.